धनगढी । तेस्रो संस्करणको धनगढी प्रिमियर लिग (डीपीएल) क्रिकेट अन्तर्गत शनिबार तय भएको पहिलो खेल रद्द भएको छ ।
बिहिबारबाट परेको बर्षाको कारण मैदानमा पानी जमेपछि शनिबारको पहिलो खेल रद्द भएको हो ।
फाप्ला क्रिकेट मैदानमा शनिबार पहिलो खेलमा विराटनगर किंग्स र काठमाडौं गोल्डेन्सबीच प्रतिस्पर्धा हुने खेल तालिका रहेको थियो ।
तर, अम्पायरले मैदानको आउटफिल्डमा जमेको पानीले गर्दा खेल खेलाउन नमिल्ने जनाएपछि खेल रद्द भएको हो । खेल रद्द भएपछि दुवै टिमले एक एक अकं बाँडेका छन् ।
यसअघि बर्षाको कारण बिहिबारको दोस्रो खेल समेत रद्द भएको थियो । महेन्द्रनगरविरुद्ध विराटनगरले ब्याटिङ गरिरहदा पानी परेपछि खेल रद्द भएको थियो ।
काठमाडौं ३ खेलबाट ५ अकं जोडेर शीर्ष स्थानमा छ । विराटनगर ४ खेलबाट ४ अकं जोडेर चौंथो स्थानमा छ ।
बर्षाको कारण शनिबारनै हुने धनगढी स्टार्स र महेन्द्रनगर युनाईटेडबीचको खेल समेत रद्द हुने सम्भावना रहेको छ ।
