एजेन्सी । बिग बास लिगको उपाधिका लागि नेपाली राष्ट्रिय क्रिकेट टिमका लेग स्पिनर सन्दिप लामिछानेले ‘मेलबर्न डर्बी’ खेल्ने पक्का भएको छ ।
दोश्रो सेमिफाइनलमा आज (शुक्रबार) भएको खेलमा मेलबर्न रेनिगेड्सले सिड्नी सिक्सर्सलाई ३ विकेटले पराजित गरेपछि सन्दिपको टोलीले फाईनलमा खेल्ने टिमको टुङ्गो लागेको हो ।
जितसंगै रेनिगेड्सले नेपाली लेग स्पिनर सन्दीप लामिछाने सम्मिलित टोली मेलबोर्न स्टार्ससंग फाइनल खेल्ने पक्का भएको छ ।
पहिलो सेमिफाइनलमा स्टार्सले होबार्ट हुरिकेंसलाई ६ विकेटले पराजित गर्दै फाइनलमा आफ्नो स्थान सुरक्षित गरेको थियो । आइतबार बिहान उपाधिका लागि दुई टोलीको भिडन्त हुनेछ ।
‘हेड टु हेड’ हेर्दा मेलबर्न डर्बीमा स्टार्सनै रेनिगेड्समाथि हाबी हुदै आएको छ । दुई टोली १५ पटक आमनेसामने भएका छन् । जसमा ११ पटक स्टार्सले बाजी मार्न सफल भएको छ ।
यो सिजनको लिग चरणमा पनि स्टार्सले नै दुवै खेल जितेको थियो ।
लिग चरणमा सन्दीपले रेनिगेड्सको १ विकेट लिन सफल भएका थिए । उनले ४ ओभरमा ३१ रन दिदै टम कुपरलाइ बोल्ड गरेका थिए । खेल स्टार्सले ७ विकेटले जितेको थियो ।
