काठमाडौं । सहिद स्मारक 'बी' डिभिजन लिग फुटबलमा पुल्चोक स्पोर्टस् क्लबले दोस्रो जित निकालेको छ । बिहिबार भएको खेलमा मध्यपुर युथ एसोसियसनलाई २-१ गोल अन्तरले पराजित गर्दै पुल्चोकले दोस्रो जित निकालेको हो ।
सातदोबाटोस्थित एन्फा कम्प्लेक्समा भएको खेलमा पुल्चोकलाई जित दिलाउन राम काजी कुमाल र टिका राज गुरुङले एक एक गोल गरे । मध्यपुरका प्रदिप लम्सालले एक गोल फर्काए ।
खेलको ३५ औं मिनेटमा रामले गोल गर्दै पुल्चोकलाई सुरुवाती अग्रता दिलाए । ३५ औं मिनेटमा टिकाले गोल गर्दै पुल्चोकको अग्रता २-० को बनाए । खेलको ५२ औं मिनेटमा प्रदिपले एक गोल फर्काएपनि टोलीलाई हारबाट जोगाउन सकेनन् ।
जितसंगै पुल्चोकले २ खेलबाट ६ अंक जोडेको छ । मध्यपुरको ३ अंक छ ।
लिग अन्तर्गत बिहिबार भएको खेलमा श्री कुमारीले रानीपोखरी कर्नर टिम आरसीटीलाई ४-२ गोल अन्तरले पराजित गर्यो । श्री कुमारीले २ गोलको अग्रता उल्टाएर जित निकालेको हो ।
श्री कुमारीको जितमा सुजन महर्जनले दुई गोल गरे । यस्तै गणेश बडवाल र विशाल तामाङले एक एक गोल गरे । आरसीटीका संसार नन्द प्लानचोके र उनम बुढाथोकीले एक एक गोल गरे ।
लिगमा श्री कुमारी र आरसीटीको २ खेलबाट समान ३/३ अंक छ ।
