धनगढी । तेस्रो संस्करणको धनगढी प्रिमियर लिग (डीपीएल) क्रिकेट अन्तर्गत विराटनगर किंग्स र महेन्द्रनगर युनाइटेडबीचको खेल बर्षाको कारण प्रभावित भएको छ ।
फाप्ला क्रिकेट मैदानमा जारी विराटनगर र महेन्द्रनगरबीचको खेल बर्षाको कारण रोकिएको छ । महेन्द्रनगरविरुद्ध टस जितेर विराटनगरले ब्याटिङ गरिरहदा पानी परेपछि खेल रोकिएको हो ।
बर्षाले खेल रोकिनु अघि विराटनगरले १८ ओभर ३ बलमा ७ विकेट गुमाएर ८२ रन जोडेको छ ।
महेन्द्रनगरविरुद्ध मैदान उत्रदा विराटनगर दोस्रो जितको खोजीमा हुनेछ । पहिलो खेलमा रुपन्देहीसंग पराजित विराटनगरले दोस्रो खेलमा धनगढीलाई हराएको थियो । विराटनगर २ खेलबाट २ अंक जोडेर चौथो स्थानमा छ ।
महेन्द्रनगर भने पहिलो जितको खोजीमा हुनेछ । लिगको पुछारमा रहेको महेन्द्रनगरलाई प्ले अफमा स्थान बनाउन विराटनगरविरुद्ध जित निकाल्नु पर्ने हुन्छ । पराजित भए महेन्द्रनगरको प्ले अफ सम्भावना कमजोर बन्नेछ ।
महेन्द्रनगर पहिलो खेलमा रुपन्देही र दोस्रो खेलमा काठमाडौं गोल्डेन्ससंग पराजित भएको थियो ।
