काठमाडौं । सहिद स्मारक 'बी' डिभिजन लिगमा आज (बिहिबार) दुई खेल हुदैछन् । प्रतियोगिताका दुबै खेल ललितपुरको सातदोबाटोस्थित एन्फा कम्प्लेक्समा हुनेछ ।
पहिलो खेलमा पुल्चोक स्पोर्टस् क्लब र मध्यपुर युथ क्लब प्रतिस्पर्धा गर्दैछन् ।
दिउँसो साँढे १२ बजे हुने खेलमा दुबै टोली दोस्रो जितको खोजीमा हुनेछन् । यसअघि भएको पहिलो खेलमा दुबै टोली विजयी भएका थिए । पुल्चोकले बाँसबारीलाई ३–१ ले हराएको थियो भने मध्यपुर युथले खुमलटारलाई ३–२ ले पराजित गरेको थियो ।
आजनै हुने दोस्रो खेलमा रानीपोखरी कर्नर टिम आरसीटीले श्री कुमारीसंग प्रतिस्पर्धा गर्नेछ । खेल दिउँसे साँढे ३ बजे सुरु हुनेछ । आरसीटीले पहिलो खेलमा नयाँ बस्तीलाई ३–१ ले पराजित गरेको थियो । सातदोबाटोले श्री कुमारी क्लबलाई २–१ ले पराजित गरेको थियो ।
प्रतियोगितामा मात्र एक खेल जितेका पुल्चोक, मध्यपुर र आरसीटीको तीन अंक छ । श्री कुमारी अंक बिहिन छ । राउण्ड रोबिन लिगका आधारमा खेलाइने प्रतियोगितामा दुई समुहका विजेता र उपविजेता दोस्रो चरणमा प्रवेश गर्नेछन् ।
