धनगढी । तेस्रो संस्करणको धनगढी प्रिमियर लिग क्रिकेट (डीपीएल) मा आज बिहिबार दुई खेल हुँदैछ । बिहिबार रुपन्देही च्यालेन्जर्स र सिवाईसी अत्तरिया तथा विराटनगर किंग्स र महेन्द्रनगर युनाइटेडबीच प्रतिस्पर्धा हुनेछ ।
फाप्ला क्रिकेट मैदानमा हुने पहिलो खेलमा शीर्ष स्थानको रुपन्देहीलाई अत्तरियाले चुनौती दिनेछ । रुपन्देही र अत्तरियाबीचको खेल बिहान ९ बजेबाट सुरु हुनेछ ।
अत्तरियाविरुद्ध मैदान उत्रदा बसन्त रेग्मीको रुपन्देही लगातार तेस्रो जित निकाल्ने लक्ष्यमा हुनेछ । र, रुपन्देही प्ले अफमा पुग्न चाहन्छ । अघिल्ला दुई खेलमा लगातार जित निकालेको रुपन्द्देही ४ अंक जोडेर शीर्ष स्थानमा छ । रुपन्देहीले पहिलो खेलमा महेन्द्रनगर र दोस्रो खेलमा विराटनगरलाई हराएको थियो ।
यता,दिपेन्द्र सिंह ऐरीको अत्तरिया लगातार दोस्रो जितको खोजीमा हुनेछ । पहिलो खेलमा धनगढीलाई हराएको अत्तरियाले १ खेलबाट २ अंक जोडेको छ । लिग लिडर रुपन्देहीलाई हराएर अत्तरिया प्ले अफ पुग्ने सम्भावना बलियो बनाउन चाहन्छ ।
यस्तै बिहिबार हुने करण केसीको विराटनगरले शरद भेषवाकरको महेन्द्रनगरसंग खेल्नेछन् । दुईबीचको खेल दिउँसो १ बजे सुरु हुनेछ ।
महेन्द्रनगरविरुद्ध मैदान उत्रदा विराटनगर दोस्रो जितको खोजीमा हुनेछ । पहिलो खेलमा रुपन्देहीसंग पराजित विराटनगरले दोस्रो खेलमा धनगढीलाई हराएको थियो । विराटनगर २ खेलबाट २ अंक जोडेर चौथो स्थानमा छ ।
महेन्द्रनगर भने पहिलो जितको खोजीमा हुनेछ । लिगको पुछारमा रहेको महेन्द्रनगरलाई प्ले अफमा स्थान बनाउन विराटनगरविरुद्ध जित निकाल्नु पर्ने हुन्छ । पराजित भए महेन्द्रनगरको प्ले अफ सम्भावना कमजोर बन्नेछ ।
महेन्द्रनगर पहिलो खेलमा रुपन्देही र दोस्रो खेलमा काठमाडौं गोल्डेन्ससंग पराजित भएको थियो ।
