धनगढी । तेस्रो संस्करणको धनगढी प्रिमियर लिग (डीपीएल) क्रिकेटमा विराटनगर किंग्सले धनगढी स्टार्सलाई जितका लागि १०४ रनको सामान्य लक्ष्य दिएको छ ।
फाप्ला क्रिकेट मैदानमा टस जितेर पहिले ब्याटिङ गरेको विराटनगरले पुरै २० ओभर खेल्दै ९ विकेट गुमाएर १०३ रन बनायो ।
विराटनगरका अभिनास यादवले सर्वाधिक २७ रन जोड्दा कप्तान करण केसीले २१ रन बनाए । यस्तै आसिफ शेखले १२ रन जोड्दा संसद शेख ११ रनमा आउट भए ।
विराटनगरलाई सस्तैमा समेट्न धनगढीका कप्तान सोमपाल कामी र विपिन कार्कीले ३/३ विकेट लिए । सोमपालले ३ ओभरमा ८ रन खर्चिए भने विपिनले ४ ओभर बलिङ गर्दै १९ रन खर्चिए । रोबिन क्षेत्रीले २ विकेट लिए ।
आज दुवै टोली पहिलो जितको खोजीमा रहेका छन् । धनगढीले २ खेल खेलिसक्दा अंक जोड्न सकेको छैन् ।
पहिलो खेलमा काठमाडौं र दोस्रोमा अत्तरियासंग पराजित धनगढी पाँचौ स्थानमा छ ।
यस्तै विराटनगर पहिलो खेलमा रुपन्देहीसंग ५ विकेटले पराजित भएको थियो ।
