धनगढी । तेस्रो संस्करणको धनगढी प्रिमियर लिग क्रिकेट (डीपीएल) मा आज बुधबार दुई खेल हुँदैछ । बुधबार काठमाडौं गोल्डेन्स र महेन्द्रनगर युनाइटेड तथा धनगढी स्टार्स र विराटनगर किंग्सबीच खेल हुनेछ ।
फाप्ला क्रिकेट मैदानमा हुने पहिलो खेलमा काठमाडौं र महेन्द्रनगरले प्रतिस्पर्धा गर्नेछ । पहिलो खेलमा बिहान ९ बजेबाट सुरु हुनेछ ।
महेन्द्रनगरविरुद्ध मैदान उत्रदा ज्ञानेन्द्र मल्लको कप्तानीमा रहेको काठमाडौं लगातार दोस्रो जित निकाल्ने लक्ष्यमा हुनेछ । काठमाडौंले पहिलो खेलमा धनगढीलाई ४ विकेटले हराएको थियो ।
काठमाडौं २ अंक जोडेर तेस्रो स्थानमा छ । जित निकाले काठमाडौं शीर्ष दुईमा पुग्नेछ ।
यता, शरद भेषावकरको टिम महेन्द्रनगर पहिलो जितको खोजीमा रहेको छ । पहिलो खेलमा रुपन्देही च्यालेन्जर्ससंग २ रनले पराजित महेन्द्रनगर चौंथो स्थानमा छ ।
यस्तै बुधबार हुने दोस्रो खेलमा पुछारको दुई टोली धनगढी र विराटनगरबीच खेल हुनेछ । दुईबीचको खेलमा दिउँसो १ बजे सुरु हुनेछ ।
मैदान उत्रदा दुवै टोली पहिलो जितको खोजीमा हुनेछन् । सोमपाल कामीको धनगढीले २ खेल खेलिसक्दा अंक जोड्न सकेको छैन । पहिलो खेलमा काठमाडौं र दोस्रोमा अत्तरियासंग पराजित धनगढी पाँचौ स्थानमा छ ।
यस्तै करण केसीको कप्तानीमा रहेको विराटनगर पहिलो खेलमा रुपन्देहीसंग ५ विकेटले पराजित भएको थियो ।
