धनगढी । तेस्रो संस्करणको धनगढी प्रिमियर लिग क्रिकेट (डीपीएल) मा आज मंगलबार दुई खेल हुँदैछ । मंगलबार पहिलो खेलमा सिवाईसी अत्तरिया र धनगढी स्टार्स तथा विराटनगर किङस र रुपन्देही च्यालेन्जर्सबीच खेल हुनेछ ।
फाप्ला क्रिकेट मैदानमा हुने पहिलो खेलमा अत्तरिया र धनगढीले प्रतिस्पर्धा गर्नेछन् । पहिलो खेलमा बिहान ९ बजेबाट सुरु हुनेछ ।
दिपेन्द्र सिंह ऐरीको कप्तानीमा रहेको अत्तरिया धनगढीलाई हराउँदै जितबाट प्रतियोगिताको सुरुवात गर्न चाहन्छ । त्यसका लागि अत्तरिया धनगढीको चुनौती पन्छाउने लक्ष्यसहित मैदान उत्रने छ ।
यता सोमपाल कामीको धनगढी पहिलो जितको खोजीमा हुनेछ । पहिलो खेलमा काठमाडौं गोल्डेन्ससंग ४ विकेटले पराजित धनगढीलाई प्ले अफको सम्भावना बलियो बनाउन जित निकाल्नै पर्ने हुन्छ।
यस्तै खेलमा विराटनगर र रुपन्देहीबीच खेल हुनेछ । दुईबीचको खेलमा दिउँसो १ बजे सुरु हुनेछ ।
करण केसीको कप्तानीमा रहेको विराटनगर जितबाट प्रतियोगिताको सुरुवात गर्ने लक्ष्यसहित मैदान उत्रने छ । विराटनगरको यो पहिलो खेल हो ।
यता, रुपन्देही लगातार दोस्रो जितको खोजीमा हुनेछ । सोमबार भएको पहिलो खेलमा रुपन्देहीले महेन्द्रनगर युनाइटेडलाई २ रनले हराएको थियो ।
रुपन्देही २ अंक जोडेर लिगको दोस्रो स्थानमा छ । काठमाडौं गोल्डेन्स २ अंक जोडेर शीर्ष स्थानमा छ ।
