एजेन्सी । इङ्ग्लिश प्रिमियर लिग फुटबलमा आर्सनलले जित निकालेको छ । शनिबार भएको खेलमा आर्सनलले हडर्सफिल्ड टाउनलाई २-१ गोल अन्तरले हराएको हो ।
हडर्सफिल्डको मैदानमा आर्सनललाई जित दिलाउन एलेक्स इओबी र एलेक्जेन्डर लाकाजेट्सले एक एक गोल गरे । हडर्सफिल्डले एक गोल आत्मघाती उपहार पाएको थियो । आर्सनलका सिड कोलासिनाचले आत्मघाती गोल गरे ।
खेलको १६ औं मिनेटमा इओबीले आर्सनललाई सुरुवाती अग्रता दिलाएका थिए । ४४ औं मिनेटमा लाकाजेट्सले गोल गर्दा आर्सनल २-० ले अघि रह्यो । खेलको इन्जुरी समयमा आर्सनलका कोलासिनाचले आत्मघाती गोलको उपहार दिएपनि हडर्सफिल्डले खेल २-१ ले गुमायो ।
जितसंगै आर्सनलले २५ खेलबाट ४७ अंक जोडेको छ । आर्सनल लिगको छैटौं स्थानमा छ । पराजित हडर्सफिल्ड ११ अंक जोडेर लिगको पुछारमा छ ।
प्रिमियर लिग अन्तर्गत नै अर्को खेलमा एभर्टन वाट्फोर्डसंग १-० ले पराजित भयो । कार्डिफ सिटीले साउथह्याम्पटनलाई २-० ले हराउँदा वेष्ट ह्याम र क्रिस्टल प्यालेसले १-१ गोलको बराबरी खेल्दै बाडेका छन् ।
