काठमाडौं । नेपाली राष्ट्रिय टोलीका लेग स्पिनर सन्दीप लामिछाने रहेको टिम मेलबर्न स्टार्सले बिग बास लिगमा आज (शुक्रबार) ब्रिसबेन हिटसंग प्रतिस्पर्धा गर्दैछ ।
ब्रिसबेनमा हुने दुई टोलीबीचको खेल नेपाली समय अनुसार अपरान्ह ३:२५ बजे सुरु हुनेछ । ब्रिसबेनविरुद्ध मैदान उत्रदा मेलबर्न स्टार्स जित निकाल्दै प्ले अफमा पुग्ने सम्भावना बलियो बनाउन चाहन्छ । सन्दीपको टिम मेलबर्न १२ अंक जोडेर चौथो स्थानमा रहेको छ ।
ब्रिसबेनविरुद्धको खेलमा नेपाली टोलीका युवा लेग स्पिनर सन्दीप टिममा पर्ने सम्भावना बलियो रहेको छ । मेलबर्नले निकालेको सम्भावित खेलाडीको सूचीमा सन्दीप परेका छन् ।
सन्दीप युएईविरुद्धको एकदिवसीय र टी-ट्वान्टी सिरिज खेलेर अष्ट्रेलिया पुगिसकेका छन् । सन्दीप लिग चरणको २ खेल बाँकी रहदा टिममा सामेल हुन त्यसतर्फ गएका हुन् ।
बिग बास लिग खेल्ने पहिलो नेपाली क्रिकेटर बनेका सन्दीपले यसअघिको ४ खेलमा उत्कृष्ट प्रदर्शन गरेका थिए । सन्दीपले बिग बासको ४ खेलमा ८ विकेट लिन सफल भएका थिए । त्यसपछि सन्दीप बंगलादेश प्रिमियर लिग खेल्न बंगलादेश आएका थिए ।
सिल्हेट सिक्सर्सबाट बीपीएल खेलेका सन्दीपले ६ खेलमा ४ विकेट लिन सफल भएका थिए ।
-1736559847.jpg)
