काठमाडौं । नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले नेपाली राष्ट्रिय क्रिकेट टोलीले विश्वमा नेपालको सम्मान र इज्जत बढाउन सफल भएको भन्दै बधाई तथा शुभकामना दिएका छन् ।
ऐतिहासिक सिरिज जितेर फर्किएको नेपाली राष्ट्रिय क्रिकेट टोलीका सदस्यलाई खुमलटारस्थित निवासमै बोलाएर अध्यक्ष दाहालले बधाई दिएका हुन् । अध्यक्ष दाहालले नेपालको ऐतिहासिक जीतले खुशी दिएको बताए ।
देश समृद्धिको यात्रामा अघि बढेको बेला राष्ट्रिय एकतालाई मजबुत गर्न क्रिकेट खेलमा भएको प्रगतिले ठूलो भुमिका खेलेको उनले बताए । दाहालले राज्यले खेल क्षेत्रलाई विशेष महत्व दिएको र चितवनमा बन्ने स्टेडियमबाट क्रिकेट खेलको विकासमा झन योगदान पुग्ने विश्वास व्यक्त गरे ।
आफ्नो तर्फबाट क्रिकेट क्षेत्रको विकास र खेलाडीको मनोबल उच्च राख्न सक्दो सहयोग गर्न पहल गर्ने दाहालले विश्वास दिलाए । नेकपा अध्यक्षलाई भेट गर्न नेपाली राष्ट्रिय टोलीका खेलाडी खुमलटार पुगेका थिए ।
-1736559847.jpg)
