जोसे अर्जेन्टिनाको टोलीमा

काठमाडौं। पाल्मेइरासका स्ट्राइकर जोसे म्यानुएल लोपेजले अर्जेन्टिना राष्ट्रिय टोलीमा पहिलो पटक स्थान बनाएका छन्। अर्जेन्टिनाले विश्वकप छनोटमा भेनेजुएला र इक्वेडरसँग खेल्दैछ।

३८ वर्षीय कप्तान लिओनल मेसीको नेतृत्वमा घोषित टोलीमा रियल मड्रिडमा भर्खरै अनुबन्ध भएका युवा प्रतिभा फ्रान्को मास्तान्तुओनो र म्यानचेस्टर सिटीका क्लाउडियो एचेभेरी पनि परेका छन्।

फ्लाको उपनामले चिनिने लोपेजले पाल्मेइरासमा उत्कृष्ट प्रदर्शनका गर्दै आएका छन्। त्यसैले मुख्य प्रशिक्षक लिओनल स्कालोनीको ध्यान खिच्न सफल भएका हुन्। १.९ मिटर अग्ला यी स्ट्राइकरले यस वर्ष ४२ खेलमा १५ गोल गरेका छन्।

विश्व च्याम्पियन अर्जेन्टिना पहिले नै २०२६ विश्वकपका लागि छनोट भइसकेको छ र दक्षिण अमेरिकी छनोट समूहमा शीर्ष स्थानमा रहेको छ। अर्जेन्टिनाले सेप्टेम्बर ४ मा ब्युनस आयरेसको मोनुमेन्टल स्टेडियममा भेनेजुएलासँग खेल्नेछ।

सेप्टेम्बर ९ मा ग्वायाक्विलमा इक्वेडरसँग अन्तिम डबलहेडर खेल्नेछ। चेल्सीका मिडफिल्डर एनजो फर्नान्डेज भने कोलम्बियाविरुद्ध जुन महिनामा रातो कार्ड पाएपछि दुई खेलको प्रतिबन्धका कारण अनुपस्थित रहनेछन्। 

उनको स्थानमा पोर्चुगलको पोर्टोका स्टार एलेन वराला छनोट भएका छन्।