एजेन्सी । स्पेनिस ला लिगा फुटबलमा रियल मड्रिडले सहज जित निकालेको छ । आइतबार राति भएको खेलमा रियलले डिपोर्टिभो अलाभेसलाई ३-० ले हराएको हो ।
घरेलु मैदानमा रियललाई जित दिलाउन करीम बेन्जिमा,भिनिसियस जुनियर र मरीयानो डियाजलाई एक एक गोल गरे ।
सान्टियागो बेर्नाबेउमा खेलको ३० औं मिनेटमा बेन्जिमा गोल गर्दै रियललाई सुरुवाती अग्रता दिलाएका थिए । खेलको ८० औं मिनेटमा जुनियरले गोल गर्दै रियलको अग्रता २-० को बनाए । त्यसपछि खेलको इन्जुरी समयमा डियाजले गोल गर्दै रियललाई ३-० को जित दिलाए ।
जितसंगै तेस्रो स्थानको रियलले २२ खेलबाट ४२ अंक जोडेको छ । सातौं स्थानको अलाभेसको ३२ अंक छ । रियल शीर्ष स्थानको बार्सिलोनाभन्दा ८ अंक र दोस्रो स्थानको एट्लेटिको मड्रिड भन्दा २ अंकले पछि छ ।
लिगमा बार्सिलोनाको ५० अंक रहदा एट्लेटिकोको ४४ अंक छ । आइतबार राति एट्लेटिकोलाई रियल बेटिसले १-० ले हराएको थियो ।
