फिदिमलाई हराउँदै सलहेश सेमिफाइनल प्रवेश

इलाम। गत संस्करणको उपविजेता सलहेश फुटबल क्लब ताप्लेजुङ गोल्डकपको सेमिफाइनल प्रवेश गरेको छ।

पाँचथरको फिदिम स्पोर्टिङ क्लबलाई ६–० गोलले हराउँदै सलहेशले अन्तिम ४ मा स्थान बनाएको हो। फाइनल प्रवेशका लागि सलहेशले रेडस्टार क्लब झापासँग प्रतिस्पर्धा गर्नेछ। 

पहिलो हाफमा ४–० गोल अन्तरको अग्रता बनाएको सिराहाले दोस्रो हाफमा थप २ गोल गर्न सफल रह्यो। 
सदिया आदमले पहिलो हाफको पाँचौं मिनेटमै गोलको खाता खोलेको थिए।

सदियाले हानेको गोल पोलमा ठोकिएर भुइँमा झरेको थियो। तत्कालै डिफेन्सले बाहिर फाले पनि गोलले लाइन क्रस गरेकोले रेफ्रीले गोलको निर्णय गरेका थिए।

३५ औं मिनेटमा सुजित बुढाथोकीले हानेको फ्रि–किक दोस्रो गोलमा परिणत भयो। फिदिमका गोलरक्षक असिम खड्काले रोक्न सकेनन्।  युसुफ मल्लिकले ३७ औं मिनेटमा डिबक्स भित्रैबाट तेस्रो गोल गरे। ४२ औं मिनेटमा सिराहाले उपहार गोल प्राप्त गर्यो।

जंगबहादुर खड्काले बल क्लियर गर्ने क्रममा जाली चुमेपछि पहिलो हाफ ४–० रहयो। ६६ औं मिनेटमा युसुफले व्यक्तिगत दोस्रो गोल गरे। ८० औं मिनेटमा मोहित गुरुङले छैटौं गोल गरे। 

गत संस्करणमा समेत दुवै टिम क्वाटरफाइनलमा भिडेका थिए। खेल सिराहाले १–० गोल अन्तरले जितेको थियो। मंगलबारको म्यान अफ द म्याच युसुफ भए। उनले नगद सात हजार प्राप्त गरे।

पहिलो सेमिफाइलन खेलमा द योङ ब्रदर्स इटहरी र चर्च बोइज युनाइटेड भिड्नेछन्। इटहरीले घरेलु टिम तेल्लोक स्र्पोटिङ क्लब र चर्च बोइजले लिजेन्ड फुटबल एकाडेमी सिलिगुडी भारतलाई हराएको थियो।