पूर्णिमा, सिम्रन र अनिशा सम्मानित

इलाम। नेपाली यु–२० महिला टोलीकी स्ट्राइकर पूर्णीमा थुलुङ राईसहित तीन खेलाडी सम्मानित भएका छन्।

थुलुङ (राई) सामा केन्द्रीय सरोकार समितिले मंगलबार यु–२० महिला फुटबल टोलीका पूर्णिमासहित डिफेन्डरद्वय सिम्रन बायुङ राई र अनिशा साम्पाङ राईलाई जनही २५/२५ हजारका साथ सम्मान गरेको हो।

बंगलादेशको ढाकामा सम्पन्न साफ महिला यु–२० च्याम्पियनसिपमा पूर्णिमाले सर्वाधिक १० गोल गरेकी थिइन्।

तर, बंगलादेशसँग ३–२ र ४–० को फराकिलो हारसँगै नेपाल उपविजेतामा सीमित भएको थियोे। उक्त टोलीमा सिम्रन र अनिशा पनि थिइन्।

यी तीन खेलाडीले भुटानमा एएफसी महिला यु–२० एसियन कप छनोट पनि खेलेका थिए। भुटानसँग १–१ को बराबरी र साउदी अरबसँग १–० को जित नेपालले निकालेको थियोे।

तर, जित्नैपर्ने अन्तिम खेलममा साबिक विजेता उत्तर कोरियासँग ११–० को फराकिलो हार बेहोरेपछि नेपाल समूह चरणबाटै बाहिरिएको थियो।