‘साम्बा’ म्याक्सिम्याक्सको ब्रान्ड एम्बेसडर

काठमाडौं। नेपाली राष्ट्रिय महिला फुटबल टोलीकी फरवार्ड सावित्रा भण्डारी ‘साम्बा’ म्याक्सिम्याक्स एजुकेसन एन्ड माइग्रेसन सर्भिसेसको ब्रान्ड एम्बेसडर नियुक्त भएकी छन्।

म्याक्सिम्याक्सका प्रबन्ध निर्देशक रोजन धरेल र सावित्राले मंगलबार सम्झौतापत्रमा हस्ताक्षर गरेका हुन्। सम्झौता तीन वर्षको भए पनि रकम भने खुलाइएको छैन।
 
२९ वर्षीया सावित्रा नेपाली जर्सीमा सर्वाधिक अन्तर्राष्ट्रिय गोलकर्ता हुन्। उनले ६० खेलमा ६६ गोल गरेकी छन्। उनले उज्बेकिस्तानमा भएको एएफसी महिला एसियन कप छनोटका ३ खेलमा २ ह्याट्रिकसहित ९ गोल गरेकी थिइन्। 

भारतीय महिला सुपर लिगमा उनले जम्मा २४ खेलमै ६० भन्दा बढी गोल गरेकी थिइन्। त्यही लोभलाग्दो प्रदर्शनको आधारमा उनलाई फ्रान्सेली क्लब अभान्ट ग्वेन्ग्याम्पले २ सिजन अनुबन्ध गरेको थियो। उनी शीर्ष युरोपेली लिगमा खेल्ने र गोल गर्ने पहिलो नेपाली खेलाडी हुन्।

त्यसअघि सावित्राले इजरायलको हापोएल रानानाबाट खेलेकी थिइन्। नेपालमा विभागीय टोली एपिएफ एफसीबाट खेल्दै आएकी सावित्रासँग माल्दिभ्स र भारतीय लिग खेलेको अनुभव पनि छ। उनले आगामी सिजन वेलिङ्टन फिनिक्सबाट अस्ट्रेलियनको निन्जा ‘ए’ लिग खेल्ने छिन्।

निक्सले आगामी दुई सिजनका लागि अनुबन्ध गरेको हो। यो लिगमा अस्ट्रेलिया र न्युजिल्यान्डका क्लब खेल्ने गर्छन्। वेलिङ्टन फिनिक्स न्युजिल्यान्डको क्लब हो।