नतिजा र गोल संख्याले जित्नैपर्ने दबाबमा नेपाल
काठमाडौं। साफ महिला यु–२० च्याम्पियनसिप उपाधि निर्णायक मोडतिर मोडिएको छ।
अंकतालिकाको शीर्ष स्थानमा अपराजित बंगलादेश १२ अंकसहित अगाडि छ। तर, तीन अंकले पछाडि रहेको नेपाल अझै होडमा छ।
शर्त यति मात्र हो, अब नेपालले नतिजाले मात्र होइन, गोल संख्याले पनि घरेलु टोली बंगलादेशलाई जित्नैपर्नेछ। यस्तोमा शनिबार नेपाललाई भुटानले चुनौती प्रस्तुत गर्दैछ। भुटान त्यही टोली हो, जसलाई नेपालले प्रतियोगिताको पहिलो खेलमा ६–१ ले पाखा लगाएको थियो।
प्रतियोगिताबाट बाहिर भइसकेको भुटानले श्रीलंकाविरुद्धको एक खेल जित्नुबाहेक खासै ठूलो उपलब्धि हासिल गर्न सकेको छैन। यथार्थमा भुटान नेपालका लागि गोलअन्तर सुधार्ने अवसर बनेर आएको टोली हो।
नेपाली टोलीका मुख्य प्रशिक्षक भन्छन्,‘नेपालका प्रत्योक खेलाडीले गोल गरिरहेका छन्। त्यसैले विपक्षीलाई को स्ट्राइकर हो? को खेलाडीले गोल हान्छ भनेर कम्फ्युज छ। त्यसैले भुटानविरुद्ध बलियो प्रदर्शन गरेर बंगलादेशसँग अर्कै रणनीतिले खेल्छौं।’
शनिबार नै बंगलादेश श्रीलंकासँग खेल्दैछ। श्रीलंका त्यही टोली हो, जसलाई बंगलादेशले उद्घाटन खेलमै ९–१ ले हराउँदै आफ्नो शक्ति प्रदर्शन गरेको थियो।
जुनसुकै नतिजा आए पनि बंगलादेश आफ्नो अग्रता कायम राख्ने रणनीतिमा हुनेछ। तर, उसले त्यो नाफा अन्तिम खेलसम्म पुर्याउन चाहन्छ, जहाँ नेपालसँगको सीधा भिडन्त बाँकी नै छ।
अब समीकरण यस्तो बनेको छ– भुटानविरुद्ध फराकिलो जित निकाल्नैपर्ने दबाबमा नेपाल छ। ताकि अन्तिम खेलअघि बंगलादेशसँग फराकिलो गोल अन्तरको खाडल देखियोस्।
नेपालले ४ खेलमा २२ गोल गर्दा ४ गोल खाएको छ। समान खेलमा बंगलादेशले समान गोल खाँदै १९ गोल गरेको छ।
यदि शनिबार बंगलादेशले पनि श्रीलंकामाथि भारी जित निकाल्छ भने जुलाई २१ मा हुने नेपाल–बंगलादेश भिडन्त मात्र उपाधिका लागि निर्णायक हुनेछ। तर, त्यो खेल नेपालले जितेर मात्र हुँदैन, पर्याप्त गोल अन्तर बनाइ उपाधि हत्याउनुपर्ने हुन्छ।
यही कारण शनिबारको खेल नेपालका लागि तीन अंक बटुल्ने मौका होइन, उपाधिउन्मुख रहन गोलकै भाषा बोल्ने अभ्यास पनि हो। गोलपछिको गोल अहिले नेपालको आवश्यकता हो।
अर्कोतर्फ बंगलादेश रणनीतिक हिसाबले सुरक्षित खेल्नेछ। यदि श्रीलंकामाथि पर्याप्त जित निकाल्न सके बंगलादेशले नेपालविरुद्धको खेललाई बराबरीमा टुंग्याएर पनि उपाधि उचाल्न सक्छ। त्यसैले अबको दुई दिन उपाधिको दौड अंकले होइन, गोलले तय गर्नेछन्।
यही गोलको घनचक्करमा नेपालको पहिलो उपाधि सपना र बंगलादेशको लगातार दोस्रोपल्ट साफ यु–२० को उपाधि जित्ने लक्ष्य अल्झिएको छ।
