एजेन्सी । फ्रेन्च लिग फुटबलमा रेलिगेसन क्षेत्रबाट निस्कन संघर्षरत टिम मोनाकोले निकालेको जित छ । शनिबार राति भएको खेलमा मोनाकोले टुलुसलाई २-१ गोल अन्तरले हराएको हो ।
घरेलु मैदानमा मोनाकोलाई जित दिलाउन एलेजेन्ड्रा गोलोभिनले र सेस फाब्रिगासले एक एक गोल गरे । टुलुसका क्रिस्टोफर जुलियनले एक गोल फर्काए ।
यस सिजन खराब प्रदर्शन गरिरहेको मोनाकोले खेलको १५ औं मिनेटमा गोलोभिनको गोलबाट अग्रता बनाएको थियो । तर, खेलको २० औं मिनेटमा जुलियनले गोल गर्दै टुलुसलाई खेलमा फर्काए ।
त्यसपछि खेलको ६२ औं मिनेटमा फाब्रिगासले गोल गर्दै मोनाकोलाई महत्वपूर्ण ३ अंक दिलाए । दुई साताअघि मात्र चेल्सीबाट मोनाको आएका फाब्रिगासको यो क्लबका लागि पहिलो गोल समेत हो ।
जितसंगै मोनाकोले २३ खेलबाट १८ अंक जोडेको छ । र, मोनाको लिगको १८ औं स्थानमा उक्लिएको छ । पराजित टुलुस २६ अंक जोडेर लिगको १४ औं स्थानमा छ ।
