आशिष भन्छन्– एन्फामा राम्रो रिह्याब पाइएन

काठमाडौं। पाँच महिनादेखि मैदानभन्दा चार पर्खालबीच सीमित जीवन बिताइरहेका छन् मिडफिल्डर आशिष राई।

 गत वर्ष चीनको युनान प्रान्तीय टोलीसँगको मैत्रीपूर्ण खेलका क्रममा मोरी मेडलेको ट्याकलले आशिषको खुट्टा भाँचिएको थियो। 

राई पछिल्लो पाँच महिनायता अखिल नेपाल फुटबल संघ(एन्फा) होस्टलमा छन् ।  तर, उनको इच्छा फेरि मैदानमा दौडिने छ। तर, उचित उपचार र रिह्याबको पर्खाइले त्यो सपना अहिले अधुरो बनाए उनले बताएका छन्।

‘आज चोटले गर्दा एन्फा होस्टलको कोठामा थुनिएको ठ्याक्कै पाँच महिना भयो । मेरो मनले मैदानमा दौडन चाहेको छ । तर, उचित उपचार र रिह्याबको पर्खाइले त्यो मनको सपना अहिले अधुरो छ । मैदानमा फर्कन अझै कति कुर्नुपर्ने हो थाहा छैन ,’ आशिषले लेखेका छन्।

त्रिपुरेश्वरस्थित दशरथ रंगशालामा चीनको युनान प्रान्तीय टोलीविरुद्ध खेलको ३७औं मिनेटमा विपक्षी खेलाडी मोरी मेडलेको  ट्याकलमा आशिषको खुट्टा तीन ठाउँमा भाँचिएको थियो । त्यसपछि  बि एन्ड बि अस्पतालमा उनको शल्यक्रिया गरिएको थियो। 

एन्फाले गत वर्षदेखि फिजियोथेरापी एन्ड रिह्याबिलिटेसन डिपार्टमेन्ट सञ्चालनमा ल्याएको थियो। तर, उक्त डिपार्टमेन्टले सही तरिकाले काम नगरेको उनको भनाइ छ। ‘मैले धेरै कुराको माग गरेको होइन, विगतका दिनमा दाइहरुले मैदानमा फर्कन विशेष साथ पाउनुभएको थियो । मलाई पनि त्यही साथ मिलोस्,’ उनले लेखेका छन्।