टेनिसमा स्थापित हुँदै नयाँ पुस्ता

काठमाडौं। कार्लोस आल्काराजको विम्बलडनमा लगातार तेस्रो उपाधि जित्ने सपना आइतबार नराम्ररी टुट्यो।

इटालियन स्टार जानिक सिनरले उनलाई सेन्टर कोर्टमा ४–६, ६–४, ६–४, ६–४ ले हराउँदै उपाधि खोसे। यो आल्काराजको ग्रान्ड स्लाम फाइनलमा पहिलो हार हो। तर, हारपछि पनि स्पेनिस युवा स्टार निराश भएनन्। उनले गर्वका साथ भने,‘मैले जे सकिन्थ्यो, सबै गरें। सिनरले आज अविश्वसनीय खेले। हार्दासमेत म टाउको उठाएर कोर्टबाट जान सक्छु।’

केही हप्ता अघि फ्रेन्च ओपनको पाँच सेटको रोचक फाइनलमा आल्काराजले सिनरलाई हराएका थिए। तर, यो पटक पासा उल्टियो। ‘यो पराजय दुःखद छ, अझ बढी जब फाइनलमा हारिन्छ। तर, पछिल्लो चार हप्तामा लन्डनको घाँसे कोर्टमा मैले जुन मेहनत गरें, त्यसले मलाई गर्वित बनाउँछ,’ उनले पत्रकार सम्मेलनमा भने।

रोजर फेडेरर, राफायल नडाल, एन्डी मुर्रेजस्ता खेलाडीको बिदाइपछि टेनिसमा नयाँ पुस्ता स्थापित हुँदैछ। आल्काराज र सिनर त्यो नेतृत्वमा अगाडि छन्। पछिल्ला ९ ग्रान्ड स्लाममध्ये ८ वटा यी दुईले बाँडेका छन्—चार/चार।

‘जब हामी एकअर्कासँग खेल्छौं त्यसबेला खेलको स्तर अरू कुनै पनि जोडीकोभन्दा निकै माथि हुन्छ,’ आल्काराजले भने। उनी थप्छन्,‘हामी मास्टर्स र ग्रान्ड स्लाम फाइनलमा भिडिरहेका छौं। यो प्रतिस्पर्धा अझ गहिरिँदै जान्छ। त्यसैले म हरेक दिन १०० प्रतिशत दिन बाध्य हुन्छु। किनभने सिनरलाई हराउन उच्चतम स्तर चाहिन्छ।’

प्रशिक्षक डेरेन केहिलका अनुसार सिनरले अरू कुनै खेलाडीभन्दा बढी आल्काराजका खेल हेर्ने गर्छन्। उनी भन्छन्,‘सिनर आल्काराजका खेलबाट प्रभावित छन्। त्यसैले उनी हरेक दिन आफूलाई सुधार्न कोचिङ टिमलाई पनि सास्ती दिन्छन्।’

यो जितसँगै सिनरले आल्काराजविरुद्धको लगातार पाँच हारको सिलसिला तोडेका छन्। यी दुईबीचको हेड टु हेड अहिले ८–५ को अनुपातमा आल्काराजको पक्षमा छ। सिनर भन्छन्,‘धेरैपटक हार्दा मनोबल कमजोर पर्न सक्छ, तर मैले कहिल्यै हिम्मत हारिन्। आज पनि केही पक्षमा उनी मभन्दा अगाडि थिए। त्यसैले हामी अझ सुधार गर्नेछौं।’

फ्रेन्च ओपनको पाँच घण्टाभन्दा लामो फाइनलमा सिनरले तीनवटा च्याम्पियनसिप पोइन्ट गुमाएका थिए। त्यो पराजयबाट उनी सिकेर फर्कनेमा आल्काराजलाई कुनै शंका थिएन।

‘सिनर महान च्याम्पियन हुन्। च्याम्पियनहरूले हारबाट सिक्छन्। मलाई थाहा थियो, उनले त्यस गल्ती दोहोर्‍याउँदैनन्। आज उनले जुन स्तर देखाए, म अचम्ममा परिनँ,’ आल्काराजले निष्कर्ष निकाले। यी दुई युवा खेलाडीबीचको यो प्रतिस्पर्धा अहिलेको टेनिसमा सबैभन्दा उच्चस्तरको भिडन्त बन्न पुगेको छ। तर, भविष्यमा यस्ता रोमाञ्चक यात्रा अझै बाँकी छ।