पीएसजीलाई हराउँदै चेल्सीले जित्यो क्लब विश्वकप

काठमाडौं। कोल पाल्मरको दोहोरो गोलसँगै चेल्सीले क्लब विश्वकपको पहिलो बिस्तारित संस्करणको फाइनलमा पेरिस सेन्ट–जर्मेन (पीएसजी) लाई ३–० ले हराउँदै उपाधि जित्यो।

अमेरिकाको मेटलाइफ स्टेडियममा सोमबार बिहान भएको खेलको पहिलो हाफमै चेल्सीले खेलको दिशा तय गरिसकेको थियो। पाल्मरले २२औं र ३०औं मिनेटमा बाँया खुट्टाले गोल गर्दै चेल्सीलाई अग्रता दिलाए।

त्यसपछि ४३औं मिनेटमा उनले एक उत्कृष्ट थ्रू पास दिए, जसमा जोआओ पेड्रोले गोलकिपर जानलुइजी डोनारुम्मालाई चिप गर्दै तेस्रो गोल पूरा गरे।

पाल्मर भन्छन्, ‘यो अपूर्व अनुभूति हो। सबैले हामीलाई कमजोर मानेका थिए। तर, प्रशिक्षकले उत्कृष्ट योजना बनाए। उनलाई थाहा थियो स्पेस कहाँ छ।’

पाल्मरले यस सिजन कुल १८ गोल गरेका छन्। म्यानचेस्टर सिटीबाट दुई वर्षअघि चेल्सी आएका २३ वर्षीय पाल्मर हाल क्लबका मुख्य खेलाडीमध्ये एक बनेका छन्।

८४औं मिनेटमा पीएसजीका जोआओ नेभेसले चेल्सीका मार्क कुकुरेलाको कपाल तानेपछि रातो कार्ड पाएका थिए। खेलको अन्त्यतिर वातावरण तातिएको थियो।

पीएसजीका मुख्य प्रशिक्षक लुइस एनरिके र गोलकिपर डोनारुम्माले जोआओ पेड्रोलाई मध्य भागनजिकै धकेल्दा दुवै टिमका खेलाडीबीच धकेलाधकेलसमेत भएको थियो।

लिग १, फ्रेन्च कप र पहिलोपटक च्याम्पियन्स लिग जितेर ‘क्वाड्रपल’ टार्गेटमा रहेको पीएसजीका लागि यो हार तीतो बन्यो। यसअघि क्लबले अक्टोबर २०२३ मा न्यूक्यासलसँग ४–१ को हार बेहोरेको थियो। त्यसयता तीन गोलको अन्तरले पीएसजी कहिल्यै पराजित भएको थिएन।

पीएसजीका प्रशिक्षक एनरिके भन्छन्,‘उनीहरूमा गजबको ऊर्जा थियो। मलाई लाग्छ, आज उनीहरू हामीभन्दा उत्कृष्ट रहेनौं।’

प्रीमियर लिगको चौथो स्थानमा रहँदै तेस्रो दर्जाको युएफा कन्फरेन्स लिग जितेको चेल्सीको यो दोस्रो क्लब विश्वकप उपाधि हो। यसअघि सन् २०२१ मा ७ टिम सहभागी संस्करणमा चेल्सी विजेता बनेको थियो।

यसपटक ३२ टिम सहभागी प्रतियोगितामा चेल्सीले करिब १२८ मिलियन डलरदेखि १५३ मिलियन डलरसम्म पुरस्कार राशि प्राप्त गर्नेछ।

फाइनल हेर्न ८१ हजार १८८ दर्शकको उपस्थिति रहेको थियो, जसमा अमेरिका राष्ट्रपति डोनाल्ड ट्रम्प पनि थिए। खेलपछि ट्रम्प मैदानमा पुग्दा केही दर्शकले हुटिङ गरे।

उनले फिफा अध्यक्ष जियानी इन्फान्टिनोसँग मिलेर कप्तान रिस जेम्सलाई ट्रफी हस्तान्तरण गरे र चेल्सीका खेलाडीहरूसँग फोटो खिचाए।

अब चेल्सी २०२५–२६ सिजनको इङ्लिस प्रिमियर लिगको तयारीमा जुट्नेछ। चेल्सीले साबिक विजेता लिभरपुलसँगै म्यानचेस्टर सिटी र आर्सनलसँग प्रिमियर लिग उपाधिका लागि प्रतिस्पर्धा गर्ने छ।