ललितपुर । सिएमजी संकटा क्लबले ललित स्मृति यू - १८ फुटबल च्याम्पियनसिपमा विजयी सुरुवात गरेका छन् । सोमबार भएको पहिलो खेलमा विभागीय टोली एपीएफ क्लबलाई २ - १ ले हराउदै संकटाले प्रतियोगितामा सुखद सुरुवात गरेको हो ।
सातदोबाटोस्थित एन्फा कम्प्लेक्समा भएको प्रतिस्पर्धात्मक खेलमा अभिषेक श्रेष्ठले खेलको अतिरिक्त समयको अन्तिम मिनेटमा गोल गर्दै संकटालाई २ - १ को जित दिलाएका हुन् ।
यसअघि खेलको ५५ औँ मिनेटमा भोजराज मगरले हेड गोल गर्दै एपीएफलाई सुरुवाती अग्रता दिलाएका थिए । तर, खेलको ५८ औं मिनेटमा उमेश बुराले गोल गर्दै संकटालाई खेलमा फर्काएका थिए ।
खेलको म्यान अफ दि म्याच संकटा क्लबका नरेश गिरी घोषित भए । उनलाई नेपाल राष्ट्रिय टिमका सदस्य विशाल राईले मेडल हस्तान्तरण गरे ।
