काठमाडौं। इङ्लिस प्रिमियर लिगका शनिबारका दुई खेलले शीर्ष चारको दौड र रेलिगेसनको कथा दुवैमा नयाँ मोड ल्याएको छ।
न्यूक्यासल र चेल्सीले महत्त्वपूर्ण जित निकाल्दै च्याम्पियन्स लिगमा आफ्नो स्थान सुरक्षित गर्ने यात्रालाई मजबुत बनाएका छन्। अर्कोतर्फ इप्सविच टाउन सिजन सकिनुअघि नै रेलिगेट हुने तेस्रो टिम बनेको छ।
मुख्य प्रशिक्षक एडी हाउ निमोनियाबाट निको भएर डगआउट फर्केको दिन न्यूक्यासलले सेन्ट जेम्स पार्कमा इप्सविचलाई ३–० ले पराजित गर्यो। यस जितसँगै न्यूक्यासल शीर्ष पाँचमा उक्लिएको छ। यो अर्को सिजनको च्याम्पियन्स लिगमा सहभागिता सुनिश्चित गर्ने सर्त हो।
तर, यो नतिजा इप्सविचका लागि दुःखद रह्यो। गायक एड शिरान आंशिक स्वामित्वमा रहेको क्लबले प्रिमियर लिगमा टिक्न सकेन र साउथह्याम्पटन तथा लेस्टर सिटीसँगै च्याम्पियनसिपमा फर्किएको छ। लगातार दोस्रो सिजन तीनवटै प्रोमोट भएका थिए। तर, फेरि रेलिगेट भएका हुन्।
स्टामफोर्ड ब्रिजमा भएको अर्को खेलमा चेल्सीले एभर्टनमाथि १–० को संघर्षपूर्ण जित हात पार्यो। पहिलो हाफमा निकोलस ज्याक्सनले गरेको गोल निर्णायक बन्यो। चेल्सी अहिले पाँचौं स्थानमा पुगेको छ। तर, न्यूक्यासलभन्दा दुई र म्यानचेस्टर सिटीभन्दा एक अंकले पछि परेको छ।
शीर्ष सात टोलीबीच मात्र पाँच अंकको दूरी छ। यसले अन्तिम खेललाई रोमाञ्चक बनाएको छ। शनिबार एस्टन भिल्लाले प्रिमियर लिग खेल खेलेन। यो टोलीले वेम्ब्ली स्टेडियममा एफए कप सेमिफाइनलमा क्रिस्टल प्यालेससँग भिडिरहेको छ। एफए कप अन्डरडग टिम भिल्लाले जित्न सक्ने आशा कायमै छ। तर, म्यानचेस्टर सिटीले तगारो बनेन भने।
यता, लेस्टर सिटीका आइकन जेमी भार्डीले आफ्नो बिदाइ सिजनको सुरुआत वुल्भ्ससँगको ३–० को हारबाट गरे। उनले खेलमा पाएको पेनाल्टी अवसर गुमाएका थिए। वुल्भ्सका माथियस कुञ्हाले एक गोल र दुई गोलमा असिस्ट गरे। उनलाई समर ट्रान्सफर विन्डोमा म्यानचेस्टर युनाइटेडले अनुबन्ध गर्न सक्ने चर्चा तातिएको छ।
अर्कोतर्फ, रेलिगेसन खतरा टार्न संघर्षरत साउथह्याम्पटनले फुलहमसँग घरमै २–१ को हार बेहोर्न पुग्यो। अन्तिम समयमा गोल खाँदै साउथह्याम्पटन मात्र ११ अंकमा सीमित रह्यो। यो प्रिमियर लिग इतिहासमै सबैभन्दा कम अंक गर्ने कीर्तिमान हो। सन् २००७–०८ मा डर्बी काउन्टीले यो खराब कीर्तिमान बनाएको थियो।
ब्राइटनले वेस्ट ह्यामविरुद्ध नाटकीय रूपमा ८९औं मिनेट र इन्जुरी टाइममा गोल गर्दै ३–२ को जित निकालेको छ। वेस्ट ह्यामका लागि नयाँ प्रशिक्षक ग्राहम पोटरको सुरुआत भने निराशाजनक बनेको छ। सात खेलदेखि टोलीको जितविहीन यात्रा जारी छ।
-1745684043.jpeg)
