काठमाडौं। बार्सिलोनाका शीर्ष स्कोरर रोबर्ट लेवान्डोस्कीको चोटले क्लबको सिजनका सबैभन्दा महत्वपूर्ण खेलअघि चिन्ता बढाएको छ।
शनिबार ला लिगामा सेल्टा भिगोमाथि भएको ४–३ को रोमाञ्चक जितको अन्तिम मिनेटतिर पोल्यान्डका स्ट्राइकर लेवान्डोस्कीले आफैंलाई परिवर्तन गर्न संकेत गरेका थिए। उनी मैदानमै बस्दै बायाँ तीघ्रा समातिरहेका देखिए र त्यसपछि हिँड्दै मैदानबाट बाहिरिए।
बार्सिलोनाका प्रशिक्षक हान्सी फ्लिकले लेवान्डोस्कीको स्वास्थ्य स्थिति मूल्यांकन गर्न आइतबार मेडिकल परीक्षण गरिने जानकारी दिए। ‘हामी पर्खनु पर्छ,’ उनले भने।
बार्सिलोनाका लागि सिजन अझै तनावपूर्ण छ। टोली तीन प्रतियोगिताको उपाधि होडमा छ।
बार्सिलोनाले मंगलबार ला लिगामा मल्लोर्कासँग खेल्नेछ। त्यसपछि अप्रिल २६ मा कोपा डेल रे फाइनलमा रियल मड्रिडको सामना गर्नेछ। त्यसको चार दिनपछि इन्टर मिलानसँग च्याम्पियन्स लिगको सेमिफाइनल सुरु हुनेछ।
लेवान्डोस्कीले यस सिजन बार्सिलोनाका लागि ४० गोल गरेका छन्, जसमा ला लिगामा सबैभन्दा बढी २५ गोल रहेका छन्।
