काठमाडौं। पाब्लो बारियसले ९३औं मिनेटमा निर्णायक गोल गर्दै स्पेनिस लिग ला लिगामा आइतबार राति एट्लेटिको मड्रिडलाई २–१ को रोमाञ्चक जित दिलाएका छन्।
सेभियाविरुद्धको यो जितसँगै डिएगो सिमेओनेको टोली उपाधि होडमा फेरि फर्किएको छ। यसअघि शनिबार बार्सिलोना बराबरीमा रोकिएको थियो भने रियल मड्रिड घरेलु मैदानमा पराजित भएको थियो।
जितसँगै एट्लेटिको अहिले शीर्ष स्थानको बार्सिलोनासँग सात अंकले पछि छ। यद्यपि, लिगमा आठ खेल बाँकी छन्। उपाधि दौड खुला नै भए पनि अबको प्रत्येक खेल निर्णायक हुनेछ।
सेभियाले खेलको सुरुआतमा नै अग्रता लिएको थियो। लुसिएन अगुमेले टाढाबाट गरेको प्रहारले एट्लेटिकोका गोलकिपर यान ओब्लाकले रोक्न सकेनन्।
तर, पहिलो हाफमै कन्फर गलाघरलाई लोइक बाडेले बक्सभित्र फल गरेपछि एट्लेटिकोले पेनाल्टी पाएको थियो। जुलियन आल्भारेजले सहजै गोल गर्दै खेल बराबरीमा ल्याए। आल्भारेजका लागि यो एट्लेटिकोका लागि यस सिजनको १२औं लिग गोल हो।
सेभियाले पेनाल्टीको माग गरे पनि रेफ्रीले अस्वीकार गरे। एट्लेटिकोका किपर ओब्लाकले केही उत्कृष्ट बचाउ गर्दै खेलमा टोलीलाई टिकाइ राखे। खेल बराबरीतर्फ जाँदै गर्दा २१ वर्षीय मिडफिल्डर पाब्लो बारियसले ९३औं मिनेटमा गोल गर्दै एट्लेटिकोको जित सुनिश्चित गरे।
उनको यो गोल यस सिजनको पहिलो हो। ‘हामी बारियसको प्रदर्शनबाट धेरै खुसी छौं। ऊ हरेक दिन सुध्रिँदै छ, यदि ऊ गोल गर्न थाल्यो भने टिमका लागि अझ फाइदाजनक हुनेछ,’ सिमेओनेले भने।
