काठमाडौं। नापोलीका रुमेलु लुकाकु बिलकुलै सही समयमा लयमा फर्किएका छन्।
बेल्जियन स्ट्राइकरले गत साता एसी मिलानविरुद्धको सिरी ‘ए’ खेलमा निर्णायक गोल गरेका थिए, जसअघि उनले युक्रेनविरुद्ध युएनएल प्लेअफमा बेल्जियमका लागि दुई खेलमा तीन गोल गरे।
यो प्रदर्शनसँगै लुकाकुको क्लब र देशका लागि गोल संख्या ४०० पुगेको छ। तर, लुकाकुको योगदान केवल गोलमै सीमित छैन।
उनले सिरी ‘ए’ मा आठ असिस्टसमेत गरेका छन्, जुन लाजियोका नुनो तावारेससँग संयुक्तरुपमा शीर्ष स्थान हो। उनले यस सिजन ११ गोल पनि गरेका छन्।
नापोलीले अघिल्लो सिजन निराशाजनक प्रदर्शन गर्दै १०औं स्थान हात पारेको थियो। तर, यसपल्ट अप्रत्याशित पुनरागमन गर्दै तीन सिजनभित्र दोस्रो सिरी ‘ए’ उपाधि जित्ने सम्भावनामा कायम राखेको छ ।
हाल नापोली लिग लिडर इन्टर मिलानभन्दा तीन अंकले पछि रहेको छ। तर, अझै आठ खेल बाँकी छ।
कोन्टेसँगको पुनर्मिलनपछि चम्किएका लुकाकु
लुकाकु हाल मुख्य प्रशिक्षक एन्टोनियो कोन्टेसँग पुनः काम गर्दैछन्। उनले सन् २०२१ मा इन्टरलाई लिग जिताएका थिए। इङ्लिस प्रिमियर लिग क्लब चेल्सीबाट सरुवा भएसँगै अगस्टमा डेब्युमै गोल गर्दै लुकाकुले प्रभाव जमाए।
तर, फेब्रुअरीमा नापोलीले जित्न नसकेको अवधिमा उनले गोल गर्न सकेनन्, जसले टोलीको सम्भावनामाथि प्रश्न उठाएको थियो। हालको लयले भने उपाधि होडमा नयाँ ऊर्जा भरेको छ।
कोन्टेले भिक्टर ओसिमेहेनलाई ग्यालाटासाराय पठाएपछि सेन्ट्रल फरवार्डको जिम्मा लुकाकुलाई दिएका थिए। उनले इन्टरमा दुई सिजनमा ४७ गोल गरेका थिए।
लुकाकु भन्छन्,‘म उहाँको लागि मनपर्ने खेलाडी होइन, उहाँ सधैँ मबाट अझ धेरै खोज्नुहुन्छ। तर, त्यो जिम्मेवारीले मलाई राम्रो बन्न प्रेरणा दिन्छ। म त्यसका लागि सधैं उहाँप्रति आभारी छु।’
लुकाकुलाई नापोली आउन प्रेरित गर्नेमा उनका बेल्जियन साथी ड्रीस मर्टेन्स पनि थिए। उनले १० वर्ष नापोलीमा खेले र क्लबको सर्वाधिक गोलकर्ता (१४८ गोल) बने।
‘नेपल्स आइपुगेपछि म होटलमा थिएँ र त्यहीँबाट मैले बुझें यो सहरमा फुटबल मात्र होइन, तपाईं आफैं नै जनताको प्रतिनिधि बन्नुहुन्छ। मर्टेन्सले यसबारे बताए पनि त्यो अनुभव आफैंमा असाधारण छ,’ लुकाकु भन्छन्।
अब नापोली र लुकाकुले सोमबार चौथो स्थानको बलोन्याविरुद्ध खेल्दैछ। बलोन्याले सबै प्रतियोगितामा पछिल्ला ६ खेल जितेको छ र हालै इटालियन कप सेमिफाइनलमा एम्पोलीलाई ३–० ले हराएको छ।
जसरी पनि सिजनको अन्त्य होस्, यो नापोलीका लागि अघिल्लो सिजनको असफलता पछि ठूलो पुनरागमन सावित भएको छ। अनि लुकाकुको आगमन त्यसको केन्द्रमा रहेको छ।
