काठमाडौं। क्याटलान क्लब बार्सिलोनाले प्लेमेकर डानी ओल्मो र फारवर्ड पाउ भिक्टरलाई आगामी सिजन (२०२५) का लागि टोलीमा राख्न पाउने भएका छन्। स्पेनको खेलकुद प्राधिकरणले बिहीबार उक्त निर्णय गरेको हो।
स्पेनी लिगले बार्सिलोनालाई वित्तीय अनुशासन उल्लंघन गरेको आरोप लगाउँदै यी दुई खेलाडी दर्ता गर्न अस्वीकार गरेको थियो। क्लबले गलत लेखापरीक्षण विवरण दिएको भन्दै लिगले यी खेलाडीलाई टिममा दर्ता गर्न नपाउने निर्णय गरेको थियो।
स्पेनी लिग र स्पेनी फुटबल महासंघले वर्षको अन्त्यसम्म आर्थिक नियमहरू पूरा नगरेकाले बार्सिलोनाको दर्ता अनुरोध अस्वीकार गरेका थिए। तर, स्पेनको खेलकुद प्राधिकरणले अन्तरिम आदेश दिँदै खेलाडीहरूलाई दर्ता गर्न अनुमति दिएको थियो, जुन निर्णय बिहीबार पनि कायम गरिएको हो।
यस निर्णयपछि बार्सिलोनाले ओल्मो र भिक्टरलाई टोलीमा राख्न सक्नेछ। तर, स्पेनी लिगले उक्त निर्णयविरुद्ध अपिल गर्ने बताएको छ।
बार्सिलोनाका अध्यक्ष जोआन लापोर्टाले मंगलबार लिगको आरोपलाई क्लबको छवि बिगार्ने अर्को प्रयास भनेका थिए।
उक्त विवादबीच नै बार्सिलोनाले मंगलबार राति एट्लेटिको मड्रिडलाई मड्रिडमै १–० ले पराजित गर्दै कोपा डेल रेको फाइनलमा स्थान सुरक्षित गरेको थियो।
-1743823075.png)
