काठमाडौं। आर्सनलका डिफेन्डर गेब्रियल मागल्हाएस ह्यामस्ट्रिङको चोटका कारण सिजनभर मैदानबाट बाहिरिने भएका छन्। च्याम्पियन्स लिगको क्वार्टरफाइनलमा रियल मड्रिडविरुद्धको महत्त्वपूर्ण खेलअघि आर्सनललाई रक्षात्मक संकटमा पारेको छ।
ब्राजिलका अन्तर्राष्ट्रिय खेलाडी मागल्हाएसले प्रिमियर लिगअन्तर्गत मंगलबार फुलहमविरुद्धको २–१ को जितमा पहिलो हाफमै चोट बोकेका थिए। क्लबले बिहीबार दिएको जानकारी अनुसार उनको छिट्टै ह्यामस्ट्रिङको शल्यक्रिया गरिनेछ।
क्लबले विज्ञप्तिमा भनेको छ,‘गाबीको ह्यामस्ट्रिङको शल्यक्रिया केही दिनमै गरिनेछ। त्यसपछि उनी पुनःस्थापना प्रक्रियामा प्रवेश गर्नेछन्। हाम्रो लक्ष्य उनीलाई अर्को सिजनको सुरुआतमा फिट बनाउने हो।’
रियलविरुद्धको पहिलो लेग मंगलबार हुँदैछ। तर, आर्सनललाई अन्य डिफेन्डर रिक्कार्डो कालाफिओरी, टाकेहिरो टोमियासु र बेन ह्वाइटको फिटनेसबारे पनि चिन्ता छ। दायाँ डिफेन्डर जुरियन टिम्बरले पनि फुलहमविरुद्ध खेलअघि नै चोट बोकेका छन्।
यस सिजन आर्सनलले कप्तान मार्टिन ओडेगार्ड, बुकायो साका र काय हाभर्ट्जजस्ता महत्त्वपूर्ण खेलाडीलाई लामो समयका लागि गुमाइसकेको छ। हाभर्ट्ज पनि ह्यामस्ट्रिङको चोटका कारण सिजनभर नखेल्ने भइसकेका छन्। यता, साका भने चार महिनापछि फुलहमविरुद्धको खेलमार्फत टोलीमा फर्किएका थिए।
आर्सनल हाल प्रिमियर लिगको दोस्रो स्थानमा छ र लिभरपुलभन्दा १२ अंकले पछि परेको छ। लिगमा आठ खेलहरू बाँकी छन्।
