काठमाडौं। रेफ्री कुट्न झम्टिएका नेपाल सुपर लिग (एनएसएल) फ्रेन्चाइज पोखरा थन्डर्सका किट पार्टनर प्रमुख सुन्दर थापालाई रंगशाला प्रवेश गर्न प्रतिबन्ध लगाइएको छ।
त्रिपुरेश्वरस्थित दशरथ रंगशालमा बुधबार भएको साबिक विजेता ललितपुर सिटी एफसीसँगको ३-२ को हार बेहोरेको खेलमा उनले असिस्टेन रेफ्री किशन कन्हैया र नवीन्द्र महर्जनलाई कुट्न झम्टिएका थिए।
बिहीबार एनएसएलले विज्ञप्ति निकाल्दै उनलाई कारबाही गरेको जानकारी दिएको हो। ‘एनएसएलका बाँकी खेलका लागि रंगशालामा प्रवेश निषेध गरिएको छ। प्रतिबन्धित क्षेत्रमा प्रवेश गरी रेफ्री तथा प्रतियोगिता निर्देशकमाथि आक्रमण गर्न खोजेको आरोपमा यो कारबाही गरिएको हो। उहाँको मान्यता पत्र तुरुन्त फिर्ता गर्न क्लब व्यवस्थापनलाई अनुरोध गरिएको छ,’ एनएसएलले भनेको छ।
८१औं मिनेटमा पोखराका समीरको क्रसमा कप्तान नवयुग श्रेष्ठले प्रहार गरेको बल ललितपुरका गोलकिपर जेफ्रा बाल्टुसले उत्कृष्ट बचाउन गरे। तर, पोखराका खेलाडीहरूले बलले लाइन पार गरिसकेको भन्दै गोलले मान्यता पाउनुपर्ने अडान राखेका थिए। तर, रेफ्री नवीन्द्रले गोलको मान्यता दिएनन् । त्यसपछि नवयुग र समीर रेफ्रीसँग विवादमा उत्रिएका थिए।
त्यहीबेला पोखराका किट पार्टनर प्रमुख सुन्दर रेफ्रीलाई हात नै हाल्न झम्टिएका थिए। उनलाई सम्झाउन एनएसएलका कम्पिटिसन डिरेक्टर सञ्जीव मिश्र नै पुगेका थिए। तर, सञ्जीवमाथि नै हातपात भएपछि अवस्था तनावपूर्ण भएको थियो।
पोखराको अफिसिलय बेन्च लिस्टमा नामसम्म नभएका उनलाई बाहिर निकाल्न सुरक्षाकर्मी प्रयोग गर्नुपरेको थियो। यस्तै, पोखराका किट म्यानेजर दीपक श्रेष्ठलाई दुई खेलमा प्रतिबन्ध लगाइएको छ। उनलाई डगआउट क्षेत्रमा आक्रामक र हिंसात्मक व्यवहार देखाएको आरोपमा प्रतिबन्ध लगाइएको हो। साथै पोखरालाई ५० हजार रुपैयाँ जरिवाना गरिएको छ।
