काठमाडौं। ताडेओ एलेन्डेले दोस्रो हाफको सुरुआती १७ सेकेन्डमै गोल गर्दै इन्टर मियामीलाई आइतबार चार्लोट एफसीविरुद्ध १–० को जित दिलाए।
यो जितसँगै मियामीले अमेरिकन सकर लिग (एमएलएस) कप्तान लिओनल मेसीबिनै लगातार तेस्रो खेल जितेको छ।
मेसीले पछिल्लोपल्ट फेब्रुअरी २५ मा स्पोर्टिङ कन्सास सिटीविरुद्ध खेलेका थिए। त्यसयता प्रशिक्षक जेभियर मास्चेरानोलाई उद्धृत गर्दै उनलाई थकान भएको बताइएको छ।
खेलभरि नै मियामीका समर्थकले मेसीको नाम लिँदै उनलाई मैदानमा हेर्न चाहेका थिए, तर उनी बेन्चमै बसे।
‘हामीले खेलको कुनै बिन्दुमा मेसीलाई केही मिनेट खेलाउने योजना बनाएका थियौं,’ मास्चेरानोले भने, ‘तर, खेलको गतिलाई हेर्दा र १० खेलाडीमा सीमित हुँदा हामीले उनलाई सुरक्षित राख्नु नै उचित ठान्यौं।’
मियामीले यसअघि पनि मेसीबिनै दुई खेल जितेको थियो। ह्युस्टनविरुद्ध ४–१ को जित र कन्काकाफ च्याम्पियन्स कपको अन्तिम १६ को पहिलो लेगमा काभालियर एफसीविरुद्ध २–० को जितमा उनी थिएनन्। दोस्रो लेग मार्च १३ मा किङ्स्टन, जमैकामा हुनेछ।
आइतबारको खेलमा चार्लोटको डिफेन्सलाई चकित पार्दै थोमस अविलेसले गोल गरे। यो सिजन उनको यो चौथो गोल हो।मियामीमा पहिलो सिजन खेलिरहेका एलेन्डेले पछिल्ला चार खेलमा चार गोल गरेका छन्।
मियामीका गोलकिपर ओस्कर उस्तारी ३८औं मिनेटमा चार्लोटका विल्फ्रेड जाहाविरुद्ध पेनाल्टी बक्स बाहिर फाउल गरेपछि रातो कार्ड पाउँदै मैदानबाट बाहिरिए। त्यसपछि ब्याकअप गोलकिपर रोक्को रियोस नोभो मैदान प्रवेश गर्दा मियामीले मिडफिल्डर बेन्जामिन क्रेमास्चीलाई बाहिर निकालेको थियो। बाँकी खेल मियामीले १० खेलाडीमा नै खेल्यो।
मियामीले यस सिजन एमएलएसमा सबैभन्दा बढी तीन रातो कार्ड पाइसकेको छ। मियामी अझैसम्म लिग खेलमा अपराजित छ। चार्लोटले भने लिगमा पहिलो हार बेहोरेको छ।
