काठमाडौं। ‘मड्रिड डर्बी’मा रियल मड्रिडले पुनः एट्लेटिको मड्रिडलाई पराजित गर्दै च्याम्पियन्स लिगको अन्तिम १६ को पहिलो लेगमा २–१ को जित निकालेको छ।
ब्राहिम डियाजको उत्कृष्ट गोल निर्णायक सावित भयो। रियलले एट्लेटिकोलाई यसअघि सन् २०१४ र २०१६ को च्याम्पियन्स लिग फाइनलमा पराजित गरेको थियो।
एट्लेटिकोले ११ पटकको युरोपियन प्रतिस्पर्धामा आफ्ना सहरी प्रतिद्वन्द्वीविरुद्ध केवल तीन खेल मात्र जितेको छ।
हारपछि एट्लेटिकोका प्रशिक्षक डिएगो सिमिओनेले आफ्नो टिमले राम्रो प्रतिस्पर्धा गरेको बताए। उनले भने,‘हामीले राम्रो खेलेका थियौं, तर केही गल्ती गर्यौं। दोस्रो लेग कठिन हुनेछ, तर हामी आफ्ना समर्थकहरूसँग अगाडि बढ्नेछौं।’
सान्टियागो बर्नाबेउमा भएको खेलमा रियलले पहिलो अवसरमै अग्रता लियो। खेलको १७औं मिनेटमा रोड्रिगोले गोल गर्दै घरेलु टोलीलाई अग्रता दिलाए।
फेडे वाल्भेर्डेले उत्कृष्ट पास दिएका थिए, जसलाई रोड्रिगोले तीव्र गतिमा ड्रिबल गर्दै बक्सभित्र छिरेर कर्ल गर्दै नेटको कुनामा पठाए।
एट्लेटिको धैर्यपूर्वक आफ्नो अवसरको पर्खाइमा थियो। ३२औं मिनेटमा जुलियन अल्भारेजले उत्कृष्ट गोल गर्दै खेललाई बराबरीमा ल्याए।
उनले बायाँ किनाराबाट बल लिँदै बक्सभित्र प्रवेश गरे र थिबाउट कोर्टुवालाई छक्याउँदै बल नेटमा पठाए। तर, दोस्रो हाफको ५५औं मिनेटमा डियाजले निर्णायक क्षण सिर्जना गरे।
उनले दुई जना एट्लेटिको खेलाडीलाई छलाउँदै बललाई फार पोस्टमा पुर्याए। योसँगै रियल २–१ ले विजयी भयो।
रियल अब क्वार्टरफाइनलमा स्थान बनाउन दोस्रो लेगमा आफ्नो अग्रता जोगाउन प्रयास गर्नेछ। एट्लेटिको भने पुनरागमन गर्दै इतिहास उल्टाउन चाहन्छ।
