एजेन्सी । घरेलु टोली दक्षिण अफ्रीकाविरुद्धको चौंथो एकदिवसीय क्रिकेटमा पाकिस्तानले सहज जित निकालेको छ । आइतबार भएको खेलमा पाकिस्तानले दक्षिण अफ्रीकालाई ८ विकेटले पराजित गरेको हो ।
जोहान्सबर्गमा दक्षिण अफ्रीकाले दिएको १६५ रनको लक्ष्य पाकिस्तानले ३१ ओभर ३ बलमा मात्र २ विकेट गुमाएर पुरा गर्यो । पाकिस्तानका लागि इमाम उल हकले ७१ रन जोडे । यस्तै फखर जमानले ४४ रन जोड्दा बाबर आजमले अविजित ४१ रन जोडे । दक्षिण अफ्रीकाका इमरान ताहिर र एडिले लक्कीले १/१ विकेट लिए ।
यसअघि टस हारेर पहिले ब्याटिङ गरेको दक्षिण अफ्रीका ४१ ओभरमा अलआउट हुँदै १६४ रनमा समेटिए थियो । दक्षिण अफ्रीकाका लागि हसिम अमलाले ५९ तथा फाप डु प्लेसिसले ५७ रन जोडे । पाकिस्तानका उस्मान सिनवारीले ४ विकेट लिए । यस्तै शाहिन अफ्रिदी र शादब खानले २/२ विकेट लिए ।
यो जितसंगै पाकिस्तानले दक्षिण अफ्रीकाविरुद्धको पाँच खेलको एकदिवसीय सिरिजमा २ - २ को बराबरी गरेको छ ।
