पूजा भन्छिन्– घरेलु समर्थकसामु विकेट लिननसक्नु लाजमर्दो कुरा हो

काठमाडौं। उपाधि घरैमा राख्ने लक्ष्यसाथ त्रिकोणात्मक महिला अन्तर्राष्ट्रिय टी–२० शृंखला खेल्न उत्रिएको नेपालले पाँच खेल सकिँदा पनि जितविहीन नै छ। 

अन्य चार खेलमा पराजित हुँदा विकेट लिन सफल भए पनि पाँचौं खेलमा भने नेपाल विकेटविहीन भयो। योसँगै नेपाल पाहुना टोली नेदरल्यान्ड्ससँग १० विकेटले पराजित भयो। 

घरेलु दर्शकसामु विकेटविहीन हुँदै पराजित हुनु लाजमर्दो भएको युवा अलराउन्डर पूजा महतो बताउँछिन्। ‘विकेटविहीन हुनु भनेको एकदमै लाजमर्दो कुरा हो। हामीले चार खेल हारेर पनि धेरै दर्शक समर्थन गर्न आउनुभएको थियो। तर, एक विकेट पनि लिन सकेनौं,’ उनले खेलपछि भनिन्।

नेपालले प्रस्तुत गरेको १४६ रनको लक्ष्य पछ्याएको नेदरल्यान्ड्सले दुई बल बाँकी छदै कुनै विकेट नगुमाई १५१ रन बनाएर तेस्रो जित हात पारेको थियो। नेपालका लागि भने पूजाले अविजित ६२ रनको योगदान गरिन्। उनले ५१ बलमा पाँच चौका प्रहार गरिन्। टी–२०आई मा पूजाको यो दोस्रो अर्धशतक हो । यसअघि पूजाले गत वर्ष एसिसी प्रिमियर कपमा माल्दिभ्सविरुद्ध अविजित ५९ रनको इनिङ्स खेलेकी थिइन्।

ब्याटिङमा नेपालले राम्रो प्रदर्शन गरे पनि बलिङमा भने चल्न सकेन। पूजा यसमा पनि आफैंप्रति अझ असन्तुष्ट छिन्। ‘ब्याटिङमा मैले राम्रो गरें। तर, बलिङमा राम्रो गर्न सकिन। म आफैं बलर भएको कारण पनि मैले विकेट लिनुपर्थ्यो। तर, सकिनँ,’ उनले भनिन्। 

नेपाली खेलाडीको फिटनेस राम्रो नभएको कारण फिल्डिङ पनि खराब भएको उनले बताइन्। त्यसैले नेपाली टोलीका सदस्यले फिटनेसमा सुधार गर्नुपर्ने उनले बताइन्। ‘फिटनेस भएपछि फिल्डिङ आफैंमा राम्रो हुन्छ। स्किल अरू टिमको झैं राम्रो छ। तर, हाम्रो फिटनेस नै छैन,’ उनले भनिन्। नेपाल लगातारको हारसँगै प्रतियोगिताबाट बाहिरिएको छ। अब नेपालले अन्तिम खेल थाइल्यान्डसँग शुक्रबार खेल्ने छ।