काठमाडौं। रियल मड्रिडको लगातार जितको शृंखला शनिबार ला लिगामा रेलिगेशन संकटमा रहेको एस्पान्योलसँग १–० को हारपछि आश्चर्यजनक रुपमा अन्त्य भयो।
रक्षापंक्तिका खेलाडी कार्लोस रोमेरोले खेलको अन्तिम समयमा गोल गर्दै एस्पान्योललाई तल्लो तीन स्थानबाट बाहिर ल्याए। एस्पान्योलले रेलिगेशन क्षेत्रभन्दा दुई अंक माथि उक्लिएको छ भने एट्लेटिको मड्रिडले मल्लोर्कालाई २–० ले हराएपछि रियलको अग्रता एक अंकमा झरेको छ।
१७औं स्थानमा उक्लिएको एस्पान्योलले २२ खेलबाट २३ अंक पुर्याएको छ। समान खेलबाट शीर्ष स्थानमा रहेको रियलको ४९ अंक छ भने एट्लेटिकोले ४८ अंक पुर्याएको छ।
शुक्रबार मात्र च्याम्पियन्स लिगको नकआउट चरणमा म्यानचेस्टर सिटीसँग खेल्नुपर्ने थाहा पाएको रियलले सबै प्रतियोगितामा पछिल्ला ११ खेलमध्ये १० खेल जितेर एस्पान्योलको मैदानमा यात्रा गरेको थियो।
खेलमा रियल हावी भए पनि २१औं मिनेटमा भिनिसियस जुनियरले गरेको गोललाई केलिन एमबाप्पेले एस्पान्योलका मिडफिल्डर पोल लोजानोमाथि फाउल गरेको कारण मान्यता दिइएन।
खेलको अन्तिम पाँच मिनेट बाँकी हुँदा ओमार एल हिलालीको क्रसलाई रोमेरोले भली प्रहार गर्दै गोल गरे।
