तमीमले लिए अन्तर्राष्ट्रिय क्रिकेटबाट सन्यास

काठमाडौं। बंगलादेशका पूर्वकप्तान तमीम इकबालले शुक्रबार अन्तर्राष्ट्रिय क्रिकेटबाट सन्यासको घोषणा गरेका छन्। ३५ वर्षीय स्टार खेलाडीले आफ्नो फेसबुक पोस्टमार्फत भनेका छन्, ‘यो अध्याय समाप्त भयो।’

तमीमले अन्तर्राष्ट्रिय क्रिकेटमा १५ हजारभन्दा बढी रन बनाएका छन् र बंगलादेशका लागि सबै फर्म्याटमा सर्वाधिक २५ शतक प्रहार गरेका छन्। आगामी महिना हुने च्याम्पियन्स ट्रफीका लागि उनी टोलीमा फर्कने चर्चा चलेको थियो।

तर, सन् २०२३ को सेप्टेम्बरमा राष्ट्रिय टोलीबाट अन्तिमपल्ट खेलेका तमीमले अब आफ्नो ध्यान फ्रेन्चाइज क्रिकेटमा केन्द्रित गर्ने निर्णय गरेका छन्।

उनले फेसबुकमा लेखेका छन्, ‘म अन्तर्राष्ट्रिय क्रिकेटबाट लामो समय टाढा बसेको छु। त्यो दूरी अब कम हुने छैन। मेरो अन्तर्राष्ट्रिय क्रिकेटको अध्याय समाप्त भयो।’

तमीमले सन् २००८ मा टेस्ट क्रिकेटमा डेब्यू गरेका थिए। त्यसअघि सन् २००७ मा उनले ओडिआई र टी–२० क्रिकेटमा डेब्यू गरेका थिए। आफ्नो करियरमा उनले ७० टेस्ट, २४३ ओडिआई र ७८ टी–२० खेल खेल्दै सबै फर्म्याटमा शतक बनाएका छन्। तमीमले सन् २०२३ मा पनि एकपटक अन्तर्राष्ट्रिय क्रिकेटबाट सन्यासको घोषणा गरेका थिए।

तर, त्यसबेला बंगलादेशकी प्रधानमन्त्री शेख हसिनाको व्यक्तिगत हस्तक्षेपपछि उनले निर्णय फिर्ता लिएका थिए। तर, उनलाई सोही वर्षको वर्ल्डकप टोलीबाट बाहिर राखिएको थियो। कप्तान शाकिब अल हसनले तमीमलाई ‘पूरै बालसुलभ’ भनेर आलोचना गरेका थिए।

यसै हप्ता तमीमले राष्ट्रिय छनोटकर्तासँग भेटघाट गरेका थिए, जसले उनलाई च्याम्पियन्स ट्रफीका लागि टोलीमा फिर्ता ल्याउने तयारी गरिरहेका थिए। बंगलादेशका वर्तमान कप्तान नजमुल हसन सान्तोले पनि तमीमलाई टोलीमा फर्काउन इच्छा व्यक्त गरेका थिए।

तर, तमीमले भने, ‘मैले यस विषयमा धेरै समयदेखि सोचिरहेको थिएँ। च्याम्पियन्स ट्रफीजस्तो ठूलो प्रतियोगिता अघि फेरि मबारे चर्चा हुन नदिउँ र टोलीको ध्यान अन्यत्र मोडिन नदिउँ भन्ने मेरो चाहना हो।’

उनले थपे, ‘कुनै पनि खेलाडीलाई खेल्न वा सन्यास लिन पाउने अधिकार हुन्छ। मैले आफूलाई समय दिएको थिएँ। अब मैले महसुस गरें, यो समय आएको छ।’ हाल तमीम बंगलादेश प्रिमियर लिग (बिपिएल) मा सिलेटबाट खेलिरहेका छन्। च्याम्पियन्स ट्रफी फेब्रुअरी १९ देखि पाकिस्तान र दुबईमा आयोजना हुँदैछ। बंगलादेश समूह ‘ए’ मा भारत, पाकिस्तान र न्युजिल्यान्ड छन्।