काठमाडौं। नेपाल सुपर लिग (एनएसएल) मा टिम थपिने सम्भावना निक्कै न्यून रहेको आयोजक नेपाल स्पोर्ट्स एन्ड इभेन्ट्स म्यानेजमेन्ट (एनएसइएम) का प्रबन्ध निर्देशक श्रेयांश कार्कीले बताएका छन्।
‘शून्य सम्भावना होइन तर कम छ,’ तेस्रो सिजनको तयारीमा व्यस्त रहेका कार्कीले भने, ‘एक टिम घट्यो भने पनि आठ टिम हुन्छ, जुन पर्फेक्ट नम्बर हुनेछ।’ एनएसइएमले तेस्रो सिजन २९ मार्चदेखि (१६ चैत) सञ्चालन गर्ने घोषणा गरिसकेको छ।
तेस्रो सिजनको तयारी अगाडि बढिरहेको बेला केही पुराना क्लबले नखेल्ने हल्ला चलेको छ। नयाँ टिम लिन पनि धेरै इच्छा व्यक्त गरिरहेको स्थितिमा उनले भने, ‘स्तर कायम गर्न नम्बर (टिम) बढाएर केही फाइदा देख्दिनँ।’ फ्रेन्चाइज टिमको अवधारणमा आयोजित एनएसएलको पहिलो संस्करणमा सात टिम सहभागी थिए भने दोस्रो संस्करण नौ टिमले खेलेका थिए।
‘डेब्यु’ सिजन ‘टच लाइन’मा अराजक देखिएको विराटनगर सिटी एफसीले दोस्रो सिजन खेलेन। आठ टिममध्ये च्याम्पियन काठमाडौं रेजर्स, उपविजेता धनगढी एफसी, पोखरा थन्डर्स, ललितपुर सिटी एफसी, बुटवल लुम्बिनी एफसी, एफसी चितवनले निरन्तर खेल्दा स्पोर्टिङ इलाम डे मेची, झापा एफसी र वीरगन्ज युनाइटेडले नयाँ टिमको रुपमा एनएसएलको दोस्रो सिजन खेलेका थिए, जसको फाइनलमा धनगढीलाई रोक्दै ललितपुर सिटी च्याम्पियन भएको थियो।
फोर्ब्सको अर्बपति सूचिका एक्ला नेपाली विनोद चौधरीको व्यापारिक घराना ‘चौधरी ग्रुप’ निकट एनएसइएमले एनएसएसएल आयोजनाका लागि अखिल नेपाल फुटबल संघ (एन्फा) सँग सन् २०१९ मा चार वर्षे सम्झौता गरेको थियो। उसले वार्षिक एक करोड ५० लाख रुपियाँमा बर्सेनि १० प्रतिशत वृद्धि हुने गरी २०२२ मा एन्फासँग आठ वर्षको लागि एनएसएलको सम्झौता थपेको थियो। पहिलो संस्करण २०२१ अप्रिल–मेमा आयोजना गरिएको थियो भने दोस्रो संस्करण २०२३ नोभेम्बर–डिसेम्बरमा भएको थियो।
पूरा भिडियो
-1736261934.jpeg)
-1736248541.jpg)
