सन्दीपको अर्धशतकसँगै वडा नम्बर १३ लाई उपाधि

रूपन्देही। सन्दीप यादवको अर्धशतकसँगै वडा नम्बर १७ लाई पराजित गर्दै वडा नम्बर १३ ले तिलोत्तमा मेयर कप टी–२० क्रिकेट प्रतियोगिताको उपाधिका जितेको छ।

नवजीवन खेलमैदानमा बिहीबार भएको फाइनलमा वडा नम्बरले तीन रनको रोमाञ्चक जित हात पारेको हो। वडा नम्बर १३ ले दिएको १२० रनको लक्ष्य पछ्याएको वडा नम्बर १७ ले निर्धारित २० ओभरमा ९ विकेट गुमाउँदै ११६ रन मात्रै बनाउन सक्यो।

वडा नम्बर १३ लाई जित दिलाउन अभिषेक विक र कृष्ण भुसालले समान तीन विकेट लिए। उनीहरूको कसिलो बलिङसामू वडा नम्बर १७ का ब्याटर टिकेर खेल्न सकेन।

लालबहादुर मलाहले सर्वाधिक ३० रन बनाए। २४ बल खेलेका उनले चार चौका र एक छक्का प्रहार गरे। शिव न्यौपाने १९, सुरज चौधरी १७, सागर चौधरी १२ र घनश्याम चौधरी ११ रनमा आउट हुँदा अन्यको ब्याटबाट दोहोरो अंकमा रन बन्न सकेन। वडा नम्बर १३ का लक्ष्मण कुमाल, लोकेश पाण्डे र अमन बोहराले पनि बलिङमा समान एक विकेट आफ्नो नाममा लेखाए।

त्यसअघि टस जितेर ब्याटिङ थालेको वडा नम्बर १३ ले निर्धारित २० ओभरमा ६ विकेट गुमाएर ११९  रन बनाएको थियो। वडा नम्बर १३ का सन्दीपले सर्वाधिक ५२ रन बनाए। ४९ बल खेलेका उनले ९ चौका प्रहार गरे। कृष्ण भूसाल २०,  श्रीधर बस्याल १७ र अमन बोहरा १३ रनमा आउट भए। 

वडा नम्बर १७ का सञ्जय पासवानको नाममा सर्वाधिक दुई विकेट रह्यो। फाइनल खेलको म्यान अफ द म्याच कृष्ण घोषित भए। प्रतियोगिताको उत्कृष्ट ब्याट्सम्यान वडा नम्बर १६ का विवेक अधिकारी रहे। उनले प्रतियोगिताभर १०४ रन बनाए।

सर्वाधिक ९ विकेट लिएका वडा नम्बर ६ का जय गोदार उत्कृष्ट बलर घोषित हुँदा उत्कृष्ट फिल्डर शिव न्यौपानले, उदीयमान खेलाडी सुसान्त सुवेदी र प्रतियोगिताको उत्कृष्ट खेलाडी अमन बोहरा रहे। अमनले प्रतियोगिताभर १०९ रन बनाउनुका साथै तीन विकेट लिएका थिए।

विजेता वडा नम्बर १३ ले  ५० र उपविजेता वडा नम्बर १७ ले ३० हजार रूपैयाँ प्राप्त गरे। उत्कृष्ट खेलाडीले १० तथा उत्कृष्ट बलर, उत्कृष्ट ब्याट्सम्यान र उत्कृष्ट फिल्डरले समान पाँच हजार रुपैयाँ पाए।