काठमाडौं। दक्षिण अफ्रिकाले पहिलो टेस्टमा पाकिस्तानलाई दुई विकेटले पराजित गर्दै दुई खेलको शृंखलामा १–० को अग्रता लिएको छ। योसँगै दक्षिण अफ्रिका विश्व टेस्ट च्याम्पियनसिप (डब्लुटिसी) को फाइनलमा पुग्ने पहिलो टोली बनेको छ।
दक्षिण अफ्रिकालाई जितका लागि १४८ रन चाहिएको थियो। उक्त लक्ष्य दक्षिण अफ्रिकाले आठ विकेट गुमाएर भेट्टायो। दक्षिण अफ्रिका पहिलोपल्ट डब्लुटिसीको फाइनलमा प्रवेश गरेको हो।
डब्लुटिसीको फाइनल आगामी जुन ११ देखि जुन १५ सम्म हुनेछ। साथै एक दिनलाई रिजर्भ डेको रुपमा राखिएको छ। दक्षिण अफ्रिका डब्लुटिसीको अंक तालिकाको शीर्ष स्थानमा छ। ११ खेलमा सात जित हात पारेसँगै दक्षिण अफ्रिकाको अंक प्रतिशत ६६.६७ पुगेको छ। अब डब्ल्युटिसीको फाइनलमा पुग्ने दोस्रो टिम को हुन्छ, त्यो हेर्न बाँकी छ।
भारत र अस्ट्रेलिया अहिले दोस्रो स्थानका लागि भिडिरहेका छन्। पाँच खेलको टेस्ट शृंखला तीन खेलपछि १–१ को बराबरीमा रोकिएको छ। चौथो खेल मेलबर्नमा भइरहेको छ भने शृंखलाको अन्तिम खेल जनवरी ३ देखि सिड्नीमा हुनेछ। यदि रोहित शर्माको टिमले यी दुई खेल जित्न सफल भयो भने टोली फाइनलमा पुग्ने दोस्रो टोली बन्न सक्छ। अस्ट्रेलिया ५८.८९ अंकका साथ दोस्रो र तेस्रो स्थानमा रहेको भारतको ५५.८८ अंक छ।
दक्षिण अफ्रिकाले टस जितेर पहिले बलिङ गर्ने निर्णय गरेको थियो। कामरान गुलामको अर्धशतकको मद्दतमा पाकिस्तानले २११ रन बनाएको थियो। बलिङतर्फ डेन प्याटरसनले पाँच तथा कोर्बिन बोस्चले चार विकेट लिए। जवाफमा एडेन मार्कराम (८९) र कोर्बिन बोश (८१ अविजित) को अर्धशतकीय इनिङ्समा ३०१ रनको लक्ष्य पछ्याउँदै घरेलु टोली दक्षिण अफ्रिकाले ९० रनको अग्रता लिएको थियो।
दोस्रो इनिङ्समा पाकिस्तानले २३७ रन बनाउँदा दक्षिण अफ्रिकाले १४८ रनको लक्ष्य पाएको थियो। टस हारेर पहिले ब्याटिङ गरेको तेम्बा बावुमाको टिमले आठ विकेटको क्षतिमा १५० रन बनायो।
-1735730225.jpeg)
