काठमाडौं। २८ डिसेम्बर २०२४ को दिन मुत्याला रेड्डीका लागि यस्तो क्षण बन्यो, जुन उनले आफ्नो बाँकी जीवनभर भुल्न सक्ने छैनन्।
यसै दिन उनका छोरा नितिशकुमार रेड्डी अस्ट्रेलियाको ऐतिहासिक मेलबर्न क्रिकेट मैदान (एमसीजी)मा नायकका रूपमा उदाए। ‘बक्सिङ डे’ टेस्टको तेस्रो दिन नितिशले अविजित १०५ रनको महत्त्वपूर्ण इनिङ्स खेलेर भारतलाई कठिन परिस्थितिबाट बाहिर निकाले।
नितिशले १७१ बलमा आफ्नो पहिलो टेस्ट शतक पूरा गर्नेबित्तिकै ‘स्ट्यान्ड’मा बसिरहेका मुत्यालाको आँखा भरियो। उनले हात जोडेर भगवानप्रति आभार प्रकट गरे।
‘हाम्रो परिवारका लागि यो एक विशेष दिन हो र जीवनमा यो दिन भुल्न सक्दैनौं,’ मुत्यालाले प्रसारणकर्ता फक्स स्पोर्ट्ससँग भने,‘उसले १४–१५ वर्षको उमेरदेखि नै राम्रो प्रदर्शन गर्दै आएको छ र अहिले अन्तर्राष्ट्रिय क्रिकेटमा यो निकै विशेष अनुभूति हो। म निकै तनावमा थिएँ (जब नितिश ९९ रनमा थिए)। अन्तिम विकेट मात्र बाँकी थियो । धन्न मोहम्मद सिराज नट आउट रहन सफल भए।’
भारतका पूर्वमुख्य प्रशिक्षक रवि शास्त्रीले मेलबर्न क्रिकेट ग्राउन्डमा उपस्थित ८७ हजार ०७३ दर्शकको अगाडि नितिशले आफ्नो परिवारको अगाडि आफ्नो पहिलो टेस्ट शतक प्रहार गरेको क्षणलाई ‘केकमा आइसिङ’ को संज्ञा दिएका छन्।
यो शतकसँगै उनी जारी बोर्डर–गावस्कर ट्रफीमा भारतका लागि सर्वाधिक रन बनाउने खेलाडी बनेका छन्। आठौं या त्योभन्दा कम नम्बरमा ब्याटिङ गरेर पनि अस्ट्रेलियाली भूमिमा टेस्ट शतक बनाउने उनी पहिलो भारतीय ब्याटर पनि हुन्।
सन् १९४८ मा विनु मान्कडले बनाएको १०५ रनपछि एमसिजीमा शतक बनाउने नितिश दोस्रो भारतीय खेलाडी बनेका छन् । मुत्यालाको खुसीका आँसु केवल उनको छोराको सफलताका लागि मात्र थिएन। यो क्षण उनले आफ्नो छोरालाई भारतका लागि खेल्न बलियो बनाउने आफ्नो त्याग र परिश्रमको पुष्टि पनि गर्थ्यो।
सन् २०१६ मा मुत्याला विशाखापट्टनमको हिन्दुस्तान जिंक लिमिटेडमा कार्यरत थिए। उनलाई त्यतिखेर राजस्थानको उदयपुरमा सरुवा गर्न लागिएको थियो। तर, नितिशको क्रिकेट करियर निर्माणमा ध्यान केन्द्रित गर्न मुत्यालाले २५ वर्षअगावै आफ्नो सरकारी जागिरबाट अवकास लिए।
नितिशलाई आफ्नो पूरा ध्यान दिन उनले यो कदम चालेका हुन्। आर्थिक अवस्था कमजोर हुँदाहुँदै पनि उनले नितिशको प्रशिक्षणका लागि कुनै कसर बाँकी राखेनन् र सम्भव भयसम्मका सबै सुविधा उपलब्ध गराइदिए।
मुत्यालाले सन् २०१७ मा आफ्नो छोराले अफ कन्ट्रोल फर क्रिकेट इन इन्डिया (बिसिसिआइ)बाट उत्कृष्ट यु–१६ क्रिकेटरको अवार्ड पाएको दिनको सम्झिए। त्यति बेला नितिशले आफ्ना आदर्श क्रिकेटर विराट कोहली र उनकी पत्नी अनुष्का शर्मासँग ‘सेल्फी’ लिएका थिए। मुत्यालाको त्याग र नितिशको परिश्रमले मेलबर्न क्रिकेट ग्राउन्डमा एउटा ऐतिहासिक दिनलाई जन्म दिएको छ, जुन भारतीय क्रिकेटमा सदैव सम्झिइनेछ।
