को हुन् बुमराहलाई ‘धुने’ १९ वर्षीय ब्याटर कोन्स्टास ?

काठमाडौं। बक्सिङ डे टेस्ट सुरु भएको छ। अस्ट्रेलियाले नाथन म्याकस्वीनीको स्थानमा १९ वर्षीय युवा ब्याटर साम कोन्स्टासलाई यो टेस्टमा स्थान दिएको थियो। भारतविरुद्ध उनले अर्धशतक प्रहार गर्दै टिम व्यवस्थापन र कप्तान प्याट कमिन्सको निर्णयलाई सही साबित गरे। १०० को स्ट्राइक रेटमा स्कोर गरेका उनले कीर्तिमान पनि बनाएका छन्। 

उनले अर्धशतक मात्र बनाएनन्, पहिलो बलदेखि नै भारतीय बलरमाथि दबदबा बनाए। कोन्स्टासले ६५ बलमा ६० रनको मनोरन्जनात्मक इनिङ्स खेले। यस इनिङ्समा उनले ६ चौका र दुई छक्का प्रहार गरेका थिए। उनले जसप्रित बुमराह र मोहम्मद सिराजजस्ता बलरलाई दबाबमा राख्न सफल भए। पहिलो १० ओभरमा अपरंपरागत सट खेलेका कोन्स्टासले ५२ बलमा आफ्नो अन्तर्राष्ट्रिय करियर र टेस्ट करियरको पहिलो अर्धशतक बनाए।

१९ वर्षीय ब्याटरले बुमराहलाई आफ्नो पहिलो खेलमा खुवै ‘धुए’। बुमराहले तीन टेस्टमा ५४ रन खर्चेका थिए र बक्सिङ डे टेस्टअघि आफ्नो पहिलो स्पेलमा आठ विकेट लिएका थिए। तर, यो इनिङ्समा उनले आफ्नो पहिलो ६ ओभरमा ३८ रन खर्चे। उनको इकोनोमी रेट ६ भन्दा माथि थियो।

बुमराहको छैटौं ओभरमा कोन्स्टासले १८ रन जोडे। त्यसपछि उनलाई बलिङ लाइनअपबाट हटाइयो। टेस्ट क्रिकेटको रेकर्ड उपलब्ध भएदेखि पहिलो १० ओभरमा २३ स्कूप वा रिभर्स स्कूप सट प्रहार भएका छन्। जसमध्ये पाँच वटालाई कान्स्टासले आफ्नो डेब्यु इनिङ्समा राखेका छन्।

बुमराहको पहिलो स्पेलमा कान्स्टासले ३३ बलमा ३४ रन बनाए। बुमराहले आफ्नो पहिलो स्पेलमा ब्याट्सम्यानविरुद्ध दिएको यो सर्वाधिक रन हो। यसअघि यो कीर्तिमान इङ्ल्यान्डका पूर्वकप्तान एलिस्टर कुकको नाममा थियो। उनले सन् २०१८ मा बुमराहको पहिलो स्पेलमा ४० बलमा २५ रन बनाएका थिए। सन् २०१८ मा आफ्नो डेब्यु टेस्टमा बुमराहको पहिलो स्पेलमा फाफ डु प्लेसिसले १८ बलमा २३ रन बनाएका थिए। 

सन् २०१८ पछि कोन्स्टास टेस्ट इनिङ्समा बुमराहको बलमा दुई छक्का प्रहार गर्ने दोस्रो ब्याटर पनि बनेका छन्। यसअघि सन् २०१८ मा जोस बटलरले यस्तो गरेका थिए। कोन्स्टास अस्ट्रेलियाका लागि टेस्टमा अर्धशतक बनाउने दोस्रो कान्छो ब्याट्सम्यान पनि बने। उनले १९ वर्ष ८५ दिनको उमेरमा अर्धशतक बनाए हुन्। उनीभन्दा अगाडि इयान क्रेगले सन् १९५३ मा मेलबर्नमा दक्षिण अफ्रिकाविरुद्ध १७ वर्ष २४० दिनको उमेरमा अर्धशतक बनाएका थिए।

कान्स्टास बिहीबार अस्ट्रेलियाका लागि टेस्ट क्रिकेटमा डेब्यु गर्ने चौथो कान्छो खेलाडी पनि बनेका छन्। उनले १९ वर्ष ८५ दिनको उमेरमा अस्ट्रेलियाका पूर्वकप्तान मार्क टेलरबाट ग्रिन क्याप प्राप्त गरेका थिए।

पर्थ टेस्टपछि भारतविरुद्धको दुई दिवसीय अभ्यास खेलमा कोन्स्टासको नाम चर्चामा आएको थियो। अस्ट्रेलियन पिएम ११ टोलीका लागि खेल्दै गर्दा कान्स्टासले भारतविरुद्ध शतक प्रहार गरेका थिए। कोन्स्टासले यस टेस्ट अघि ११ प्रथम श्रेणी खेलमा ४२.२ को औसतमा ७१८ रन बनाएका छन्, जसमा दुई शतक र तीन अर्धशतक समावेश छन्। सन् २०२४ मा अस्ट्रेलियालाई यू–१९ विश्वकप जिताउन कोन्स्टासले महत्त्वपूर्ण भूमिका खेलेका थिए।

उनले सात इनिङमा २७.२८ को औसतमा एक शतकसहित १९१ रन बनाएका थिए। कान्स्टासले बोर्डर–गावस्कर ट्रफीअघि अस्ट्रेलिया ए र भारत ए बीचको दुई खेलको शृंखलामा पनि सहभागिता जनाएका थिए। यस क्रममा उनले चार इनिङ्समा ९२ रन बनाएका थिए।

यसमा म्याच विनिङ ७३ रनको अविजित इनिङ्स पनि समावेश छ। जारी शेफिल्ड शिल्ड सिजनमा कोन्स्टास पाँच खेलमा ५८.८७ को औसतमा ४७१ रनसहित पाँचौं सर्वाधिक रनकर्ता हुन्। यसमा दुई शतक र एक अर्धशतक समावेश छ। उनको उत्कृष्ट स्कोर १५२ रन हो।