टेस्ट टोलीमा बाबरको पुनरागमन

काठमाडौं। पूर्वकप्तान बाबर आजमले पाकिस्तानको टेस्ट टोलीमा पुनरागमन गरेका छन्। पाकिस्तान क्रिकेट बोर्ड (पिसिबी) ले दक्षिण अफ्रिकाविरुद्ध सुपरस्पोर्ट पार्कमा हुने बक्सिङ डे टेस्टका लागि प्लेइङ ११ को घोषणा गरिसकेको छ।

बाबरले पाकिस्तानका लागि अन्तिम पटक अक्टोबरमा इङ्ल्यान्डविरुद्ध अन्तिम टेस्ट खेलेका थिए। त्यसयता दायाँ हाते ब्याट्सम्यान शृंखलाका बाँकी दुई खेलका लागि प्लेइङ ११ मा छनोट भएका थिएनन्। बाबरले सन् २०२२ को डिसेम्बरमा न्युजिल्यान्डविरुद्ध १६१ रन बनाएयता कुनै पनि शतक बनाएका छैनन्। उनको स्थानमा दायाँ हाते ओपनर अब्दुल्लाह शफिकलाई समावेश गरिएको थियो, जो हालै लगातार तीन पटक शून्यमा आउट भएका थिए।

बायाँ हाते ब्याट्सम्यान शान मसूदले टोलीको नेतृत्व सम्हाल्नेछन् भने सेतो बलका कप्तान मोहम्मद रिजवानले विकेटकिपरको भूमिका निर्वाह गर्नेछन्। पिसिबीले एकदिवसीय शृंखलामा प्लेयर अफ द टुर्नामेन्ट साम अयूबलाई पनि समावेश गरेको छ। पाकिस्तानको बलिङ आक्रमणमा नसीम शाह, मोहम्मद अब्बास, खुर्रम शहजाद र आमिर जमाल छन्। 

यसबाहेक स्पिन अलराउन्डर सलमान अली आगा पनि यसमा समावेश छन्। बायाँ हाते ब्याट्सम्यान साउद शकील र दायाँ हाते ब्याट्सम्यान कामरान गुलामले पनि टोलीमा आफ्नो स्थान पक्का गरेका छन्। यसअघि मंगलबार आयोजक दक्षिण अफ्रिकाले सेन्चुरियन टेस्टका लागि प्लेइङ ११ को घोषणा गरेको थियो भने बलिङ अलराउन्डर कोर्बिन बोसले डेब्यु गर्ने भएका छन्।