एनपिएल उपाधिका लागि सुदूरपश्चिम र जनकपुर भिड्ने
काठमाडौं। कर्णाली याक्समाथि रोमाञ्चक जित निकाल्दै जनकपुर बोल्ट्स नेपाल प्रिमियर लिग (एनपिएल) को उपाधिनजिक पुगेको छ।
बिहीबार भएको क्वालिफायर २ मा जनकपुरले कर्णालीलाई दुई विकेटले पराजित गर्दै सुदूरपश्चिम रोयल्ससँगको भेट पक्का गरेको हो।
सुदूरपश्चिमले क्वालिफायर १ मा जनकपुरलाई आठ विकेटले हराउँदै फाइनलमा स्थान पक्का गरिसकेको छ। यो खेलमा हार बेहोरेसँगै जनकपुरले फाइनलमा भिड्न अर्को अवसर पाएको थियो। उक्त अवसरलाई जनकपुरले सदुपयोग गर्न सफल भयो। कर्णालीले भने इलिमिनेटरमा चितवन राइनोजलाई २१ रनले पराजित गर्दै जनकपुरसँगको भेट पक्का गरेको थियो। यो भेट कर्णालीले सुखद् बनाउन सकेन।
कर्णालीले दिएको ११९ रनको लक्ष्य जनकपुरले अन्तिम ६ बल अगाडि नै आठ विकेट गुमाउँदै पूरा गरेको हो।लिगचरणमा चितवनविरुद्ध १८ बलमै शतक प्रहार गर्दै कीर्तिमान बनाएका न्युजिल्यान्डका ब्याटर जिमी निसमले कर्णालीविरुद्ध आक्रामक ब्याटिङ गर्दै जनकपुरलाई जितनजिक पुर्याएका हुन्।
उनी एक समय आफ्नै कीर्तिमान भंग गर्ने स्थितिमा पुगिसकेका थिए। तर, १६ बलमा दुई चौका र पाँच छक्कासहित ४५ रन बनाइसकेको अवस्थामा १६ वर्षीय दायाँ हाते स्पिनर विपिन शर्माले १५.३ ओभरमा बोल्ड गरे। सोही ओभरको अन्तिम बलमा उनले फिनिसर मोहम्मद मोहसिनलाई पनि एक रनमै एलबिडब्यु आउट गराएपछि कर्णालीले खेलमा पुनरागमन गर्ने संकेत देखाएको थियो। तर, उनी अन्तिमसम्म क्रिजमा टिक्न सकेन।
त्यसअघि जनकपुरका कुनै पनि ब्याटरले राम्रो प्रदर्शन देखाउन सकेनन्। ओपनर शुभ कंशाकार तीन, कप्तान आसिफ शेख चार, लाहिरु मिलान्था दुई, आकाश त्रिपाठी १३ र हर्ष ठाकर १७ रनमा आउट भए। तर, तल्लोक्रममा शेर मल्ले अविजित १६ रनको योगदान दिए। उनले १९औं ओभरको दोस्रो बलमा छक्का प्रहार गरेपछि जनकपुर खेलमा फर्कियो र जनकपुरलाई फाइनल पुग्न सफल भयो।
कर्णालीका विपिनले सर्वाधिक तीन विकेट लिए। चार ओभर बलिङ गरेका उनले १७ रन खर्चिए। सोमपाल कामी, विलिम बसिस्टो र जिशान मक्शूदले समान एक विकेट आफ्नो नाममा लेखाए।
त्यसअघि कीर्तिपुरस्थित त्रिवि क्रिकेट मैदानमा जनकपुरले टस जितेर कर्णालीलाई ब्याटिङको निम्तो दिएको थियो। निर्धारित २० ओभरमा ब्याटिङ गरेको कर्णालीले नौ विकेट गुमाउँदै ११८ रन बनाउन सक्यो।
कर्णालीका फिनिसर गुल्शनकुमार झाले २५ रन बनाए। २० बल खेलेका उनले एक चौका र दुई छक्का प्रहार गरे। यो नै कर्णालीका ब्याटरले बनाएको सर्वाधिक रन हो। उनीबाहेक ओपनर देव खनाल २४, विलियम बसिस्टो १४, जिशन मक्शूद युनिस ठकुरीले समान १२ र चाड्विक वाल्टन ११ ले बनाए। अन्य ब्याटरले दोहोरो अंकमा रन बटुल्न सकेनन्।
जनकपुरका ललितनरायण राजवंशी, जिमी निसम र मोहम्मद मोहसिनले समान दुई विकेट लिए। हर्ष ठाकर र शेर मल्लको नाममा समान एक विकेट रह्यो।
