सिमरा । रुस्लान थ्रीस्टार क्लब सिमरामा जारी दशौं संस्करणको रुस्लान सिमरा गोल्डकपको सेमीफाइनलमा प्रवेश गरेको छ ।
मंगलबार सिमरा रङ्गशालामा सिएमजी संकटा क्लबलाई २–० को गोल अन्तरले हराउँदै थ्री स्टार अन्तिम चारमा प्रवेश गरेको हो ।
थ्री स्टार सेमीफाइनलमा प्रवेश गरेसगै प्रतियोगिताको सेमीफाइनल समिकरण पनि पुरा भएको छ । थ्री स्टारले अब फाइनल प्रवेशका लागि हिमालयन शेर्पाको सामना गर्नेछ । बुधबार पहिलो सेमीफाइनलमा आयोजक नवजनजागृति सिमराले त्रिभूवन आर्मीसंग प्रतिष्पर्धा गर्नेछ ।
थ्री स्टारलाई अन्तिम चारमा सुरक्षित गर्ने क्रममा अफ्रिकी स्ट्राइकर फोफाना फोडे र सुसान श्रेष्ठले समान एक–एक गोल गरे । खेलको १३ औं मिनटमा फोडेले थ्री स्टारका लागि खाता खोलेका थिए । रञ्जन विष्टले डिबक्स भित्र निकालेको सुन्दर पासलाई फोडेले गोलमा परिणत गरेका थिए ।
प्रशिक्षक मेघराज केसीको पहिलो रोजाइमा नपरेका सुसान श्रेष्ठले थ्रीस्टारका लागि खेलको अन्तिम समयमा गोल गर्दै २–० को जित सुनिश्चित गरे । खेलको ७८ औं मिनटमा फोफाना फोडेको स्थानमा मैदान छिरेका सुसानले ८५ औं मिनटमा गरेको गोल थ्री स्टारको जीतमा पर्याप्त बन्यो । थ्री स्टारका रुपेश केसीले २५ यार्ड टाढाबाट प्रहार गरेको फ्रिकिक संकटाका डिफेण्डरले डिबक्सबाट क्लिएर गर्न नसक्दा सुसानले त्यसको फाइदा लिंदै जाली चुमाएका थिए ।
थ्री स्टारविरुद्धको खेलमा पाएका केहि अवसर सदुपयोग गर्न नसक्दा आठौं संस्करणको विजेता संकटा प्रतियोगिताबाट बाहिरियो । पहिलो हाफमा इन्जुरी समयको अन्तिम मिनेटमा सरोज दाहालको प्रहार थ्री स्टारका गोल रक्षक एलन न्यौपानेले विफल पारे । सेन्टर लाइनबाट एकल प्रयासमा बल अघि बढाएका दाहालले डिबक्स बाहिरबाट गरेको सशक्त प्रहार विफल हुँदा पहिलो हाफमा बराबरी खेल्ने अवसर गुमेको थियो ।
संकटाका अफ्रिकी खेलाडी क्रेडिक अब्बाले अर्को अवसर गुमाए । सेन्टर लाइनबाट अब्बाले अघि बढाएको बल डिएरियाबाट थ्रीस्टारका डिफेण्डर डाम्बियाले क्लिएर गरे ।
सिमरा रङ्गशालामा संकटा विरुद्ध हावी भएको थ्री स्टारले पनि केहि सुन्दर अवसर सदुपयोग गर्न सकेन । खेलको ५३ औं मिनटमा सुनिल वलको क्रस बल फोफाना फोडेले खेर फाले । पेनाल्टी एरियामा पाएको अवसरलाई फोडेले फितलो प्रहार गर्दा संकटाका गोलरक्षक राजाबाबु थापाले बचाउ गरे ।
५६ औं मिनटमा रञ्जन विष्टको सुन्दर पास फोडेले खेर फाले । डिबक्स भित्र रञ्जनले निकालेको बललाई फोडेले सम्हाल्न नसक्दा बाहिरियो । यस्तै खेलको ७० औं मिनटमा रञ्जन विष्टको हेडीङ बल संकटाका सरोज दाहालले गोललाईनबाट क्लिएर गरे । बल पञ्च गर्न अघि बढेका संकटाका गोलरक्षकलाई विट गर्दै रञ्जनले उत्कृष्ट हेडीङ गरेका थिए ।
खेलको म्यान अफ दि म्याच थ्री स्टारका डिफेन्डर अडामा डाम्बिया घोषित भए । उनले नगद दशहजार सहित ट्रफि हात पारे ।
हारपछि संकटाका प्रशिक्षक सल्यान खड्गीले शुरुवातमा एक गोलले पछि परेपछि खेलमा फर्कन नसक्दा पराजय व्यहोरेको बताए । आफ्ना खेलाडीले सोंचे अनुसारको प्रदर्शन गर्न नसकेको बताउँदै प्रशिक्षक खड्गीले थ्रीस्टारका खेलाडीले संकटाविरुद्ध सुन्दर प्रदर्शन गरेको बताए । 'ए'डिभिजन लिगपछि थ्री स्टारबाट बाहिरिएका खेलाडी निराजन खड्कालाई समेत थ्री स्टारविरुद्धको खेलमा मैदान उतारेको संकटाका प्रशिक्षक खड्गीले खड्का संकटासंग अनुबन्धनको प्रकृयामा रहेको बताए ।
जीतपछि खुशी देखिएका थ्री स्टारका प्रशिक्षक मेघराज केसीले लगातारको प्रतियोगिताका कारण खेलाडीले सोंचे अनुसारको प्रदर्शन गर्न नसकेको बताए । जीतपछि खुशी भएपनि थ्री स्टारका खेलाडीले स्तर अनुसारको प्रदर्शन भने गर्न नसकेकोको बताए । लिगपछि टिममा केहि नयाँ खेलाडी आएको बताउँदै उनिहरु टिममा ‘एडजस्ट’ हुन बाँकी रहेको उनको भनाई थियो ।
खप्तड गोल्डकपले सिमरा गोल्डकपमा खेल्ने अन्य टिमलाई प्रभावित बनाएजस्तै आफ्नो टिम पनि प्रभावित रहेको बताउँदै केसीले सेमीफाइनलमा थ्री स्टारले सुधारिएको खेल प्रदर्शन गर्ने बताए ।
