काठमाडौं। म्यानचेस्टर युनाइटेडका अन्तरिम प्रशिक्षक रुड भान निस्टेलरोयले आफैंप्रति गर्व गर्दै छात्ति फुलाएर भन्नै पर्छ– छोटो जिम्मेवारी भए पनि मैले गज्जब नै गरें।
किनभने अन्तरिम प्रशिक्षक जिम्मेवारी उनले सम्हाल्दा इङ्लिस प्रिमियर लिगका नौ खेलमा तीन जित निकालेको युनाइटेड १४औं स्थानमा थियो। तर, उनी आएसँगै यस्तो जादु चलाएकी टोलीले चार खेलसम्म हार के हो कल्पनासमेत गर्न परेन। घरेलु मैदान ओल्ड ट्राफोर्डमा आइतबार लेस्टर सिटीसँग भएको उनको अन्तिम खेल थियो। त्यो खेल पनि युनाइटेडले ३–० को एकपक्षीय रूपमा जित्यो।
युनाइटेडलाई पुनर्जीवित गर्ने क्रममा डच प्रशिक्षकले लिग कपमा लेस्टर र युरोपा लिगमा पिएओके सलोनिकामाथि सानदार नतिजा हासिल गरे। गत साता प्रिमियर लिगमा चेल्सीलाई पनि १–१ को बराबरीमा रोक्न उनी सफल भए।
‘
‘हामी अनिश्चित स्थितिमा थियौं। तर, हामीले हाम्रो काम गर्ने प्रयास गर्यौं। यी चार खेलमा अधिकतम फाइदा उठाऔं भनेको थिएँ,’ उनी भन्छन्, ‘मलाई लाग्छ हामीले सोहीअनुसार नतिजा ल्यायौं। मैले वास्तवमै आफ्नो जिम्मेवारीको निकै आनन्द उठाएँ, यो छोटो तर अद्भुत अवधि रह्यो।’
ब्रुनो फर्नान्डिजले निस्टेलरोयको अन्तिम खेलमा दिलोज्यान दिएर खेले। उनले खेलको १७औं मिनेटमै आइभरी कोस्टका फरवार्ड अमाद डायलोको ‘ब्याक हिल’ पासमा पेनाल्टी बक्सनजिकबाट गरेको शक्तिशाली प्रहार सीधै गोलमा परिणत भयो। युनाइटेडको जर्सीमा २५०औं खेल खेलेका उनले त्यसपछि पनि गोल निकाल्ने क्रम जारी राखेका थिए। ३८औं मिनेटमा हेडरमार्फत गरेको अर्को प्रहार लेस्टरका भिक्टर क्रिस्टियनसनलाई ‘डिफ्लेक्ट’ हुँदै जाली चुम्न पुग्यो। उक्त गोलले आत्मघातीको मान्यता पाएपनि त्यसपछि एलेजान्ड्रो गार्नाचोले बेन्चबाट मैदान प्रवेश गर्दै तेस्रो गोल गरे।
यो जितसँगै युनाइटेड प्रिमियर लिगको अंक तालिकामा १३औं स्थानमा उक्लिएको छ। तर, स्थान खराब देखिए पनि युनाइटेड शीर्ष चारमा रहेका चेल्सी र आर्सनलभन्दा चार अंकले मात्र पछि छ। हुन त निस्टेलरोयको आफ्नै भविष्य अझै अन्योलमा छ। रुबेन अमोरिमले सोमबारदेखि युनाइटेडको जिम्मेवारी सम्हालिसकेका छन्। अर्को हप्ता युनाइटेडले इप्सविचको भ्रमण गर्नेछ। इप्सविच त्यही टोली हो, जसले आइतबार मात्रै टोटनह्यामलाई १–० ले पराजित गर्दै प्रिमियर लिगमा २२ वर्षपछि पहिलो जित निकाल्दै कीर्तिमान रचेको थियो।
तर, अमोरिमको प्रशिक्षण टोलीमा उनको भूमिका रहने या नरहने निर्णय हुन अझै बाँकी छ। यद्यपि, ४८ वर्षीय निस्टेलरोयले दुई साताको अवधिमा क्लबलाई अस्थिर बनाउन आफूले गरेको कामप्रति गर्व गर्छन्।
‘यो एक ठूलो जिम्मेवारी थियो। मैले यसलाई धेरै गम्भीरतापूर्वक लिएँ। म युनाइटेडलाई राम्रो स्थानमा पुर्याउन र सहयोग गर्न चाहन्थें। त्यो लक्ष्य पूरा भएको छ,’ उनले भने।
