काठमाडौं। रोबर्टो मान्सिनीले साउदी अरेबियाबाट बाहिरिएको दुई दिनपछि हर्भ रेनार्डलाई दोस्रो पटक प्रशिक्षकको जिम्मेवारी दिइएको छ।
‘म फर्किएको छु,’ रेनार्डले साउदी अरेबिया फुटबल फेडेरेसनले सामाजिक सञ्जालमा पोस्ट गरेको भिडियोमा भनेका छन्। फ्रान्सेली महिला टोली पेरिस ओलम्पिकको क्वार्टरफाइनलसम्म पुग्दा उनले रेनार्डले प्रशिक्षकको भूमिका निर्वाह गरेका थिए।
यसअघि सन् २०१९ देखि २३ सम्म उनले साउदीको नेतृत्व सम्हालेका थिए। उनकै नेतृत्वमा सन् २०२२ मा कतारमा भएको विश्वकपमा साउदीले अर्जेन्टिनालाई २–१ ले पराजित गरेको थियो।
‘मैले साउदी छोड्ने मनसाय राखेको थिइनँ। तर, जब तपाईंको देशले ढोका ढकढक्याउँदछ तब जवाफ दिनुपर्छ,’ रेनार्डले भने,‘साउदी, समर्थक र खेलाडीलाई म कहिल्यै भुल्न सक्दिनँ।’
रेनार्डको सम्झौता सन् २०२५ को अन्त्यसम्म जारी रहनेछ। सन् २०२३ को अगष्टमा साउदीले मान्सिनीलाई नियुक्त गरेको थियो जसले इटालीलाई सन् २०२१ को युरोपियन च्याम्पियनसिपमा जित दिलाएको थियो। तर, गत जनवरीमा एसियन कपको खराब प्रदर्शन र अन्तिम १६ बाट बाहिरिएपछि उनी दबाबमा परेका थिए।
सेप्टेम्बरमा सुरु भएको एसियाको तेस्रो चरणको विश्वकप छनोटमा साउदीले चार खेलबाट पाँच अंक मात्र जोडेको छ। यसै महिना घरेलु मैदानमा जापानसँग २–० ले पराजित भएको थियो भने बहराइनसँग ०–० को बराबरी खेलेको थियो।
योसँगै साउदी ६ टिमको समूहमा तेस्रो स्थानमा उक्लिएको छ। शीर्ष दुई टोली सन् २०२६ को विश्वकपका लागि स्वतः छनोट हुनेछन्। रेनार्डको पहिलो खेल नोभेम्बर १४ मा मेलबर्नमा अस्ट्रेलियाविरुद्ध हुनेछ।
