समाल्बुङ। दोस्रो गोरख भेट्रान्स कप फुटबलको उपाधिको लागि पूर्वेली भेट्रान्स बिर्तामोड र दमक लखनपुर भेट्रान्स दमक भिड्ने भएका छन्।
शुक्रबार सम्पन्न सेमिफाइनल खेलमा विजय हासिल गर्दै बिर्तामोड र दमक उपाधिको लागि भिड्ने भएका हुन्। पहिलो सेमिफाइनल खेलमा बिर्तामोडले बरमियोक नाम्पिङ सिक्किमलाई ४–३ र दोस्रो सेमिफाइनलमा दमकले युएफसी बुङ्कुलुङलाई १–० ले हराएको हो।
सुरुवाती ३–० को अग्रता जोगाउन नसक्दा सिक्किम अन्तिम चारबाट पराजित भएको हो। खेलको तेस्रो मिनेटमा दावा भोटियाले सिक्किमलाई अग्रता दिलाए। ८ औं मिनेटमा दावाले अग्रता दोब्बर बनाए। १७ औ मिनेटमा तेन्जिङ भोटियाले ३–० बनाए। २२औं मिनेटमा प्रेम लिम्बुले गोल अन्तर कम बनाए।
पहिलो हाफमा ३–१ को अग्रता बनाएको सिक्किमले दोस्रो हाफमा थप ३ गोल बेहोर्न पुग्यो। दोस्रो हाफको ७औं मिनेटमा लिम्बुले ३–२ बनाए। ४ मिनेट नबित्दै सन्तोष राईले गोल गर्दै खेल बराबरी गरे। इन्जुरी समयमा कर्ण लिम्बुले कर्नरबाट गरेको प्रहारलाई लिम्बूले जाली चुमाउँदै ह्याट्रिक पुरा गरे। ह्याट्रिक गरेका लिम्बु म्यान अफ द म्याच घोषित भए।
उनलाई जिल्ला समन्वय समिति इलाम उपप्रमुख चित्रकला बराइलीले ट्रफी प्रदान गरिन्। त्यसै गरी दोस्रो सेमिफाइनलमा विकास राईले निर्णायक गोल गरेपछि दमकले फाइनलमा स्थान बनाएको हो। दोस्रो हाफको १५औं मिनेटमा उनले गोल गरेका थिए। अग्रता बनाएको ३ मिनेट नबित्दै दमक ६ खेलाडीमा सीमित भएको थियो। स्ट्राइकर सुवास आङथुपो रातो कार्ड खाँदै मैदान बाहिरिएका थिए। म्यान अफ द म्याच निर्णायक गोलकर्ता राई घोषित भए। फाइनल खेल कार्तिक १० गते हुनेछ।
गोरख टोल विकास संस्था सूर्योदय नगरपालिका–५ समालबुङ को आयोजना र गोरख युनाइटेड क्लबको सह आयोजनामा भएको प्रतियोगिताको विजेताले ७० हजार र उपविजेताले ३५ हजार नगद पाउने छन्। उत्कृष्ट खेलाडी, सर्वाधिक गोलकर्ता र प्रत्येक खेलका उत्कृष्ट खेलाडीलाई पनि पुरस्कार व्यवस्था गरिएको छ।
