काठमाडौं। हैदरावादमा बंगलादेशविरुद्ध टी–२० क्रिकेटमा शतक प्रहार गरेका सञ्जु सामसन अब भारतको टेस्ट टोलीमा स्थान बनाउन चाहन्छन्।
सञ्जुले ४० बलमा शतक प्रहार गरेका थिए। यो जुन कुनै पनि भारतीय ब्याट्सम्यानको दोस्रो सबैभन्दा छिटो शतक थियो। २९ वर्षीय सञ्जु शुक्रबारदेखि बेंगलुरुमा कर्नाटकविरुद्ध सुरु हुने रणजी ट्रफी खेलका लागि आफ्नो राज्य टोली केरलासँग आबद्ध भएका छन्।
‘मसँग रातो बलको क्रिकेटमा सफल हुने क्षमता छ र म आफूलाई सेतो बलको क्रिकेटमा सीमित राख्न चाहन्नँ। मेरो इच्छा भारतका लागि टेस्ट क्रिकेट खेल्ने हो। दुलीप ट्रफीअघि नेतृत्व समूहले रातो बलको क्रिकेटको लागि मेरो बारेमा सोचिरहेको र यसलाई गम्भीरतापूर्वक लिन भनेका थिए,’ उनले भने।
उनले थपे,‘यसपटक मेरो तयारी राम्रो थियो। श्रीलङ्काविरुद्धको शृंखलापछि मैले राहुल द्रविड सर र जुबिन भरुचासँग राजस्थान रोयल्सको एकेडेमीमा प्रशिक्षण लिएँ र आफ्नो खेलमा काम गरें। दुलीप ट्रफीमा शतकले मलाई धेरै आत्मविश्वास दिएको छ किनभने यो देशका केही उत्कृष्ट बलरविरुद्ध आएको थियो।’
सञ्जुले दुलीप ट्रफीमा दोस्रो र तेस्रो राउन्डमा भारत डीको लागि खेलेका थिए। केरलाका ब्याट्सम्यानले आफ्नो दोस्रो खेलमा ११औं प्रथम श्रेणी शतक बनाए।
सञ्जुको ब्याटिङ देखेर पञ्जाब किंग्सका ब्याट्सम्यान जितेश शर्माले पनि उनको निकै प्रशंसा गरे। ‘सञ्जुले ब्याटिङ गरेको देखेपछि सुखद अनुभव भयो। उनी धेरै राम्रो ब्याट्सम्यान हुन्। म डगआउटबाट उनको इनिङ्स हेरिरहेको थिएँ। ताली बजाउन आफूलाई रोक्न सकिनँ। सबैले रमाइलो गरे। उनी अनुभवी खेलाडी हुन् र म सधैं उनीबाट सिक्न चाहन्छु,’ उनले भने।
-1732845388.webp)
