काठमाडौं। आर्सनलका फरवार्ड काई हाभर्ट्जले बोस्निया एन्ड हर्जेगोभिना र नेदरल्यान्ड्सविरुद्धको नेसन्स लिग खेल गुमाउने भएका छन्।
बायाँ घुँडाको समस्याका कारण हाभर्ट्जले नाम फिर्ता लिएको जर्मन फुटबल महासंघले आइतबार जनाएको छ। इङ्लिस प्रिमियर लिगअन्तर्गत शनिबार राति भएको खेलमा आर्सनलले साउथह्याम्पटनलाई ३–१ ले पराजित गर्दा हाभर्ट्जले एक गोल गरेका थिए।
जर्मनीका प्रशिक्षक जुलियन नागेल्सम्यानले शुक्रबार बोस्निया एन्ड हर्जेगोभिना र त्यसको तीन दिनपछि म्युनिखमा हुने खेलका लागि मेन्जका फरवार्ड जोनाथन बर्कार्डलाई बोलाएका छन्।
नागेल्सम्यानले बायर्न म्युनिखका जमाल मुसियाला र वेस्ट ह्यामका निकोलस फुलक्रुगलाई हिपको समस्याका कारण टोलीमा समावेश गरेका थिएनन्। जसको अर्थ उनले आफ्नो आक्रमणमा फेरबदल गर्नुपर्ने छ, बायर लेभरकुजेनका फ्लोरियन विर्ट्ज र स्टुटगार्टका डेनिज उन्डाभले खेल्ने सम्भावना छ।
जर्मनीले नयाँ गोलकिपर पनि पाउनेछ। म्यानुएल न्युएरले युरोपियन च्याम्पियनसिपपछि सन्यास लिएका थिए। बार्सिलोनाका मार्क आन्द्रे टेर स्टेगेन घुँडाको गम्भीर चोटका कारण मैदान बाहिर छन्।
होफेनहेमका ३४ वर्षीय गोलकिपर ओलिभर बाउम्यानले बोस्निया एन्ड हर्जेगोभिनाविरुद्ध खेल्ने नागेल्सम्यानले यसअघि नै निर्णय गरिसकेका छन्। त्यस्तै, एलेक्जेन्डर नुबेल (स्टुटगार्ट) र जेनिस ब्लासविच (साल्जबर्ग) टोलीका अन्य गोलकिपर हुन्।
