काठमाडौं। मार्कस थुरामको ह्याट्रिकसँगै इन्टर मिलान सिरी ए को अंक तालिकामा दोस्रो स्थानमा उक्लिएको छ।
शनिबार राति भएको खेलमा इन्टरले टोरिनोलाई ३-२ ले पराजित गरेको हो। जितसँगै मिलानले सात खेलबाट १४ अंक जोडेको छ। जुन शीर्ष स्थानको नेपोलीको भन्दा दुई अंक कम हो। छैटौं स्थानको टोरिनोको भने ११ अंक छ।
२०औं मिनेटमा गुइलेर्मो मारिपानले रातो कार्ड पाएपछि टोरिनो १० खेलाडीमा समेटिएको थियो। त्यसको फाइदा उठाउँदै इन्टरले ३५औं मिनेटमै दुई गोलको अग्रता लियो। यी दुवै गोल थुरामले गरे। ३६औं मिनेटमा डुवान जापाटाले गोल गर्दै टोरिनोलाई खेलमा फर्काउने प्रयास गरेका थिए।
तर, ६०औं मिनेटमा थुरामले अर्को गोल थप्दै अग्रता ३-१ मा पुर्याए। ८६औं मिनेटमा निकोला भ्लासिकले पेनाल्टीमार्फत गोल गरेपनि टोरिनोलाई खेलमा फर्काउन सकेनन्।
